ლოს-ანჯელესის პოლიციამ განაახლა ჰოლივუდის მსახიობის ნატალი ვუდის ბურუსით მოცული სიკვდილის საქმის გამოძიება.

ნატალი ვუდი 1981 წელს, იახტით სეირნობდა როდესაც წყალში გადავარდა და დაიხრჩო. 37 წლის წინ ამ ამბავს უბედური შემთხვევის კვალიფიკაცია მიენიჭა. თუმცა გამოძიების ახალი გარემოებები ჟურნალისტებს სპეციალურ პრესკონფერენციაზე გააცნეს. CBS-ის ეთერში იგეგმება დოკუმენტური ფილმის ჩვენებაც.

იახტაზე ნატალი ვუდთან ერთად მისი ქმარი რობერტ ვაგნერი, მათი მეგობარი კრისტოფერ უოლკენი და იახტის კაპიტანი დენის დევერნი იმყოფებოდნენ.

როგორც ცნობილი გახდა, ვუდის საქმეზე მომუშავე დეტექტივები აპირებენ თავიდან დაკითხონ მსახიობის ქმარი, რობერტ ვაგნერი. ამბობენ იმასაც, რომ ვუდის სიკვდილი შესაძლოა მის ინტერესებში შედიოდა.

2009 წელს, იახტის კაპიტანმა დენის დევერნმა მოვლენების საკუთარი ვერსიის შესახებ დაწერა წიგნი, სადაც ის აღიარებდა, რომ 1981 წლის გამოძიების დროს, ადვოკატების ზეწოლით, რობერტ ვაგნერის ვერსიას დაეთანხმა და ნატალი ვუდის დაღუპვის ღამის ზოგიერთი გარემოება დამალა.

დევერნის თქმით, მსახიობის გაქრობამდე ვუდმა და ვაგნერმა იჩხუბეს, ხოლო დაკარგვის შემდეგ ქმარი ცოლის მოძებნას არ ითხოვდა.

სწორედ დევერნი იყო ის ადამინია, რომელმაც 2011 წელს ლოს-ანჯელესის პოლიციას პეტიცია გაუგზავნა, რომელსაც რამდენიმე ასეული ადამიანითან ერთად აწერდა ხელს და ვუდის საქმის ხელახლა გამოძიებას ითხოვდა.

აღსანიშნავია, რომ ჰოლივუდის ვარსკვლავის გვამის გაკვეთის დროს მასზე სისხლჩაქცევებიც იპოვეს და ჯერ კიდევ 37 წლის წინ გაჩნდა ეჭვი, რომ შესაძლებელია, ვუდი ძალადობის მსხვერპლი ყოფილიყო.

ნატალია ვუდი დღემდე ჰოლივუდის ერთ-ერთ ყველაზე დიდ ვარსკვლავად ითვლება. ის სამჯერ იყო წარდგენილი ოსკარზე.