თბილისის მერიაში ამბობენ, რომ დედაქალაქში არსებულ ბიბლიოთეკებში მდგომარეობის გასაუმჯობესებლად მათი რეფორმირება იწყება. მერიის პრესსამსახურის ინფორმაციით, ბიბლიოთეკაში არსებული პრობლემების გასაცნობად კახა კალაძე თბილისის N5 საქალაქო ბიბლიოთეკის თანამშრომლებს შეხვდა.

კალაძის თქმით, თბილისში არსებული 33 ბიბლიოთეკიდან 30-ში მძიმე მდგომარეობაა.

"თბილისის მერმა დედაქალაქში არსებული საქალაქო ბიბლიოთეკების თანამედროვე სტანდარტების შესაბამისად მოწყობასა და ამ მიმართულებით, რეფორმის დაჩქარების აუცილებლობაზე გაამახვილა ყურადღება", - აცხადებენ მერიაში.

მათივე ინფორმაციით, კახა კალაძემ თავის მოადგილეებს მდგომარეობის გასაუმჯობესებლად კონცეფციის წარდგენა დაავალა.