გასულ ოთხშაბათს Facebook-მა გამოაცხადა, რომ სიახლეების ზოლის (News Feed) ცვლილებას გეგმავს. საუბარია სოციალური ქსელის ე.წ. "მთავარ გვერდზე", სადაც თქვენი მეგობრების და მოწონებული გვერდების ბოლო განახლებებს ხედავთ.

კომპანიის განცხადებით, სისტემა ამიერიდან შეეცდება, ამ ზოლში გაჩვენოთ უფრო მეტი პოსტი თქვენი ოჯახის წევრების და მეგობრებისგან. ეს კი, დიდი შანსით ნიშნავს იმას, რომ ამ ცვლილების შემდეგ, ნაკლებად შეგხვდებათ ბმულები, სტატიები და ფოტოები იმ მედია-საშუალებებისგან, რომლებსაც აქამდე ფეისბუქით ადევნებდით თვალს.

ფეისბუქის თქმით, ეს გადაწყვეტილება გამოკითხვის შედეგად მიიღეს, სადაც აღმოჩნდა, რომ მომხმარებლებს უფრო მეტი პოსტის ნახვა სურდათ მეგობრებისგან, ვიდრე - კომპანიებისგან.

თუმცა, ბევრი მომხმარებელი ფეისბუქს სწორედ ახალი ამბების და საინტერესო სტატიების სანახავად იყენებს. და ეს მათ სულაც არ უშლის ხელს მეგობრების ამბების ნახვაში. თუ თქვენც ერთ-ერთი მათგანი ხართ და გსურთ, კვლავ გარანტირებულად მიიღოთ სიახლეების ზოლში ახალი ამბები On.ge-სგან, მიჰყევით ამ მარტივ ინსტრუქციას:

1. გადადით ამ ბმულზე და დარწმუნდით, რომ ჩვენი გვერდი მოწონებული გაქვთ

იმისთვის, რომ ფეისბუქის მთავარ გვერდზე ჩვენი სიახლეები მიიღოთ, პირველ რიგში, საჭიროა მოიწონოთ (Like) ჩვენი გვერდი. თუ მოწონების ღილაკი ლურჯად ანთია, გადადით მეორე ნაბიჯზე. (სურათის ინგლისური ვერსიის სანახავად, დააკლიკეთ მასზე).

2. ჩამოშალეთ "მომწონს" ღილაკის მენიუ

უბრალოდ მიიტანეთ მაუსი ლურჯად ანთებულ ღილაკთან "მოწონებულია" და გამოჩნდება მენიუ დამატებითი პარამეტრებით.

3. მონიშნეთ "იხილეთ პირველ რიგში"

ჩამოშლილ მენიუში იქნება პარამეტრი "თქვენს სიახლეების ველში", სადაც უნდა აირჩიოთ "იხილეთ პირველ რიგში". (აქაც, ინგლისური ვერსიის სანახავად, დააწკაპუნეთ ამ სურათზე)

სულ ეს არის. ამიერიდან, ფეისბუქზე შესვლისას აუცილებლად დაინახავთ On.ge-ს იმ სიახლეებს, რომელიც თქვენი ბოლო ვიზიტის შემდეგ გამოქვეყნდა. თუმცა, ეს იმას სულაც არ ნიშნავს, რომ ჩვენი ბმულებით "დაიბომბებით". ფეისბუქის ალგორითმი ყველა მომხმარებლის ქცევას აკვირდება და ცდილობს, სიახლეები გაჩვენოთ მხოლოდ იმ თემებზე, რომლებსაც ყველაზე ხშირად ეცნობით და გაინტერესებთ.

ამ მარტივი პროცედურის გავლა საჭირო იქნება ყველა იმ მედიის ან კომპანიის გვერდზე, რომლის სიახლეებიც გსურთ, რომ აუცილებლად იხილოთ თქვენს ფეისბუქში. მაგალითად, თუ მხოლოდ პოლიტიკა არ გაინტერესებთ და მეცნიერების ან გართობის მოყვარულიც ხართ, აუცილებლად მონიშნეთ იგივე პარამეტრი ჩვენი მთავარი გასართობი გვერდზეც.

ფეისბუქის ეს განახლება ცხადია არ გულისხმობს, რომ სიახლეები თქვენს მიერ მოწონებული მედია-გვერდებიდან საერთოდ აღარ შეგხვდებათ. მაგრამ კომპანიის განცხადებით, პრიორიტეტი მეგობრების ფოტოებს და ამბებს მიენიჭება. ასე რომ, ინფორმაციულ ვაკუუმში მოხვედრისგან თავის დაზღვევის მიზნით, მონიშნეთ ეს პარამეტრი თქვენთვის საინტერესო ყველა გვერდზე. თქვენი მეგობრები კი, სელფებს ისედაც არ გამოგაპარებენ.