ერთიანი ნაციონალური მოძრაობის წარმომადგენლები, სერგო რატიანი და მარიამ რამინაშვილი, აცხადებენ, რომ სასწავლო წელი სახელმძღვანელოების გარეშე ან ნახმარი სახელმძღვანელოებით დაიწყება.

"კანონმდებლობით გათვალისწინებული მოთხოვნებიდან გამომდინარე, იმისათვის, რომ სრულფასოვნად განხორციელდეს სკოლებისთვის სახელმძღვანელოებით აღჭურვა, ტენდერი არათუ გამოცხადებული, დასრულებულიც უნდა იყოს და სამინისტროს საჭირო რაოდენობის სტატისტიკაც კი არ აქვს, რაც ნიშნავს, რომ შარშანდელის მსგავსად, კვლავ სახელმძღვანელოების გარეშე ან ნახმარი სახელმძღვანელოებით დაიწყება სასწავლო წელი და მშობლებისა და მასწავლებლებისათვის, სასწავლო პროცესისათვის გახდება გადაულახავი პრობლემა" - აცხადებენ პარტიაში.

განათლების სამინისტროს ტენდერი არათუ დასრულებული, გამოცხადებულიც არ აქვს

_ ერთიანი ნაციონალური მოძრაობა

ენმ-ს თქმით, 2016-17 სასწავლო წლისათვის განათლების სამინისტრომ ვერ უზრუნველყო სასკოლო სახელმძღვანელოების გრიფირების პროცესი და დაწყებითი საფეხურის მოსწავლეები კვლავ ძველი სასკოლო წიგნებით დაიწყებენ სწავლებას.

"მოვითხოვთ განათლების მინისტრისაგან, 2016 წლის ბიუჯეტში სასკოლო სახელმძღვანელოებისათვის განკუთვნილი 12 მილიონი ლარით აღარ განხორციელდეს სასკოლო წიგნების სტამბური ბეჭდვა, მოხდეს გამომცემლობებში არსებული ნაშთების შესყიდვა, რაც, ერთი მხრივ, სასიკეთოდ წაადგება თავად გამომცემლობების საქმიანობას და ბიუჯეტიდან მილიონობით ლარის ხარჯს, რომელიც სამინისტროს უპასუხისმგებლო დამოკიდებულების გამო უაზროდ უნდა დაიხარჯოს, ნაწილობრივ მაინც სასარგებლო დანიშნულებას შესძენს. მეორე მხრივ, მოხსნის პრობლემას მოსწავლეებისათვის საჭირო რაოდენობის სახელმძღვანელოების მიწოდებასთან დაკავშირებით და ხელს შეუწყობს სასწავლო პროცესის გამართულ წარმართვას".

ენმ აცხადებს, რომ უფასო სახელმძღვანელოების პროექტისათვის 2013-1015 წლებში 33 მილიონი ლარი გამოიყო, საიდანაც გამარტივებული შესყიდვით, ერთ პირთან მოლაპარაკების საფუძველზე, 27 მილიონი გაიცა კონკრეტულ პირებზე, ელექტრონული ტენდერის გარეშე, ამ ფაქტით პირდაპირ დასტურდება, რომ არსებული ინიციატივით განათლების სისტემაში დასაქმებული მაღალჩინოსნების პირადი ინტერესების გამო დაზარალდნენ გამომცემლობები, რამაც ქვეყანაში განვითარების ეტაპზე მყოფი გამომცემლობების მიერ წამოწყებული სასარგებლო საგანმანათლებლო აქტივობები შეაფერხა.

ნაციონალური მოძრაობა გამომცემლობებსა და სახელმძღვანელოების ავტორებს ჰპირდება, რომ ხელისუფლებაში მოსვლის შემთხვევაში, 2017 წელს სასკოლო სახელმძღვანელოების ბაზრის დერეგულაციას მოახდენს. პარტიის წევრების თქმით, ამის შედეგად სახელმძღვანელოების ხარისხი გაუმჯობესდება და დაცული იქნება სახელმძღვანელოს ავტორთა საავტორო უფლებები.