უკრაინული მედია ქვეყნის საგარეო საქმეთა მინისტრ პავლო კლიმკინზე დაყრდნობით აცხადებს, რომ ქაბულში, სასტუმრო ინტერკონტინენტალზე თავდასხმისას მოკლულებს შორის ექვსი უკრაინელია. Kyiev Post-ის ცნობით, ისინი უკრაინული ავიაკომპანიის თანამშრომლები არიან.

შეიარაღებული პირები ქაბულში მდებარე ძვირადღირებულ სასტუმროს, სადაც, ძირითადად, უცხოელები ჩერდებიან, თავს 20 იანვარს დაესხნენ. ალყა 13 საათს, ბოლო თავდამსხმელის ლიკვიდაციამდე გაგრძელდა.

AFP-ის ცნობით, მომხდარზე პასუხისმგებლობა აიღო ტერორისტულმა დაჯგუფება თალიბანმა.

ეს არ არის პირველი შემთხვევა, როცა ინტერკონტინენტალი შეიარაღებული პირების სამიზნე გახდა. სასტუმროს 2011 წელს თალიბები დაესხნენ თავს. მაშინ 21 ადამიანი გარდაიცვალა, მათ შორის, 9 თავდამსხმელი. მათი მოგერიება NATO-ს ვერტმფრენით გახდა შესაძლებელი.