გირჩის რელიგიური ორგანიზაცია სახალხო დამცველთან არსებულ რელიგიათა საბჭოში გაწევრიანებას ითხოვს. საბჭოს ყველა წევრი ბიბლიური თავისუფლების მიღების წინააღმდეგია, თუმცა საბოლოო გადაწყვეტილება თავად ომბუდსმენმა უნდა მიიღოს.

გირჩის რელიგიური ორგანიზაცია Facebook-ზე წერს, რომ 2017 წლის აპრილში რელიგიათა საბჭოს რიგებში ჩართვის სურვილი გამოთქვა, თუმცა პასუხი დღემდე არ მიუღია.

ფეისბუკ სტატუსის მიხედვით, ბიბლიური თავისუფლება იზიარებს რელიგიათა გაერთიანების მიზნებს, რომელიც რელიგიის თავისუფლების დაცვაში, ტოლერანტული გარემოს გაუმჯობესებასა და სეკულარული სახელმწიფოს შენების ხელშეწყობაში მდგომარეობს:

"გვინდა სიხარულით გაცნობოთ, რომ ჩვენ, დაარსებიდან სულ რაღაც 9 თვეში, შევძელით 2000-ზე მეტი ადამიანისთვის, ჩვენი რწმენით მთავარი ღირებულების - თავისუფლების დაცვაში დახმარება. ახალ 2018 წელს, ეს ადამიანები შეხვდნენ ოჯახებში, მეგობრებთან და ნათესავებთან, ნაცვლად თავისუფლებამოძულე ადამიანების მიერ გამოგონილი საყარაულო პოსტებისა."

ომბუდსმენის ოფისში On.ge-ს უთხრეს, რომ ახალ სახალხო დამცველს, ნინო ლომჯარიას ბიბლიური თავისუფლების საბჭოში მიღების საკითხი ჯერ არ განუხილავს.

რელიგიათა საბჭოს წევრი 24 რელიგიური გაერთიანებაა :

  1. იუდაური თემი საქართველოში
  2. სომეხთა სამოციქულო წმინდა მართლმადიდებელი ეკლესიის საქართველოს ეპარქია
  3. სრულიად საქართველოს მუსლიმთა სამმართველო
  4. ქართველ მუსლიმთა კავშირი
  5. ამიერკავკასიის ლათინური წესის კათოლიკეთა სამოციქულო ადმინისტრაცია
  6. ეზიდთა სასულიერო კრება
  7. ევანგელურ–ბაპტისტური ეკლესია
  8. ევანგელურ–ლუთერული ეკლესია
  9. სახარების რწმენის ეკლესია
  10. მეშვიდე დღის ქრისტიან–ადვენტისტთა ეკლესია
  11. საქართველოს ევანგელურ–პროტესტანტული ეკლესია
  12. წმიდა სამების პროტესტანტული ეკლესია
  13. საქართველოს ევანგელისტური ეკლესია
  14. ევანგელური ეკლესია სიცოცხლის სიტყვა
  15. ევანგელურ–ბაპტისტური ეკლესია მადლი
  16. უკანასკნელი დღეების წმინდანთა ეკლესია (მორმონები)
  17. საერთაშირისო საქველმოქმედო ორგანიზაცია ხსნის არმია
  18. კრიშნას ცნობიერების საზოგადოება
  19. ევანგელისტური ეკლესია ღმერთის საელჩო
  20. ევანგელური ეკლესია ურყევი საფუძველი
  21. მეგობართა რელიგიური საზოგადოება – კვაკერები
  22. ბაჰაის საზოგადოება საქართველოში
  23. სვედენბორგიანული საზოგადოება საქართველოში
  24. სრული სახარებისეული ეკლესია ღვთის ერი