საქართველოს კომუნიკაციების ეროვნულმა კომისიამ მაგთიკომის მიერ მობილური საკონუნიკაციო მომსახურების ტარიფების გაზრდასთან დაკავშირებით სუბსიდირების საკითხის შესწავლა დაიწყო. მაგთიკომმა კომისიის წერილობითი თხოვნის საფუძველზე, ტარიფების ცვლილება დროებით შეაჩერა. ამის შესახებ ინფორმაცია კომპანიამ საკუთარ ვებგვერდზე გამოაქვეყნა.

მაგთკომის გადაწყვეტილებით, 18 იანვრიდან მაგთის მობილური ინტენრნეტის გამოყენება სხვადასხვა პაკეტების მომხმარებლებისთვის 2-5 ლარით უნდა გაზრდილიყო. კომპანია მიიჩნევს, რომ დღეს საქართველოში მობილურ მომსახურებაზე დაბალი ტარიფებია და ინტერნეტის მიწოდების ხარჯი და შემოსავალი ვერ აბალანსებს ერთმანეთს.

საქართველოს კომუნიკაციების ეროვნული კომისია მიიჩნევს, რომ მაგთიკომის მიერ მობილური ინტერნეტის პაკეტების ფასების ზრდა საბაზრო კანონზომიერების ფარგლებს სცილდება. კომისია განმარტავს, რომ მთავრობასთან მუშაობით მიღებული გადაწყვეტილებებით მობილურ სატელეკომუნიკაციო კომპანიებს ხარჯები მნიშვნელოვნად შეუმცირდათ.

კომისიაში აღნიშნავენ, რომ შესაძლოა, მაგთიკომი სამომხმარებლო ტარიფების ზრდით აფინანსებს, ან გეგმავს დააფინანსოს თვითღირებულებაზე დაბალ ფასად შეთავაზებული მომსახურებები. მარეგულირებელი უწყება განმარტავს, რომ სატელეკომუნიკაციო ოპერატორს ტარიფის გაზრდის წინაპირობა არ ჰქონდა, რადგან მაგთიკომს კაუკასუს ონლაინმა საბითუმო ინტერნეტის მიწოდების ფასი შეუმცირა.

ფასების მატების შემდეგ მაგთის მობილური ინტერნეტპაკეტი საქართველოში ყველაზე ძვირი ეღირება.

თითოეული პაკეტზე ფასი შემდეგნაირად იმატებს:

  • 500 მბ - 5₾ (ძველი ფასი 3₾);
  • 1000 მბ - 7₾ (ძველი ფასი 5₾);
  • 2 000 მბ - 12₾ (ძველი ფასი 7₾);
  • 4 000 მბ - 14₾ (ძველი ფასი 10₾);
  • 6 000 მბ - 18₾ (ძველი ფასი 15₾);
  • 15 000 მბ - 35₾ (ძველი ფასი 30₾).