თურქმა სამართალდამცავმა ორგანოებმა სტამბოლში 16 ლოკაციაზე ჩატარებული რეიდების შედეგად 13 პირი დააკავეს, რომლებსაც, სავარაუდოდ, ათათურქის აეროპორტში მომხდარ ტერაქტთან კავშირი აქვთ. დაკავებულთაგან 3 უცხოელია. ინფორმაციას Reuters ავრცელებს.

28 ივნისს, ღამით, სტამბოლის ათათურქის სახელობის აეროპორტში, აფეთქებას სულ 42 ადამიანი ემსხვერპლა, 239-ზე მეტი კი დაშავებულია. მომხდარზე ჯერჯერობით არცერთ ტერორისტულ დაჯგუფებას არ აუღია პასუხისმგებლობა.

სამართალდამცავი ორგანოები კი ჯერჯერობით არ ასაჯაროვებენ ინფორმაციას იმ 3 თვითმკვლელ ტერორისტთან დაკავშირებით, რომლებმაც აეროპორტში თავი აიფეთქეს.

ვიდეომასალის შესწავლისა და თვითმხილველების დაკითხვის შედეგად, თურქი გამომძიებლები ამბობენ, რომ თვითმკვლელი ტერორისტები, სავარაუდოდ, ISIS-ის წევრები იყვნენ.

ტერაქტის შედეგად დაღუპულთა შორის 5 საუდის არაბეთის, 2 კი ერაყის მოქალაქეა. გარდა ამისა, გარდაცვლილები არიან ჩინეთის, იორდანიის, ტუნისის, უზბეკეთის, ირანისა და უკრაინის მოქალაქეები.