ბრიტანეთის პრემიერ-მინისტრის აპარატის უფროსი დამიან გრინი თანამდებობიდან გაათავისუფლეს. გათავისუფლების მიზეზი გრინის მიერ მინისტრის პროტოკოლის დარღვევა გახდა. საქმე ეხება მინისტრთა კაბინეტის აპარატის მიერ წარმოებულ გამოძიებას. როგორც აღმოჩნდა, 2008 წელს გრინის სამუშაო კომპიუტერში ინახებოდა პორნოგრაფიული მასალები, თუმცა გრინი გამოძიებისთვის მიცემულ ჩვენებაში ამტკიცებდა, რომ მისთვის უცნობი იყო ამის შესახებ. 2008 წელს გრინი იმიგრაციის ჩრდილოვანი მინისტრის თანამდებობას იკავებდა.

დამიან გრინი ასევე იკავებდა სახელმწიფოს მდივნის თანამდებობას. გამოძიება მის წინააღმდეგ არასათანადო ქცევის მოტივით მიმდინარეობდა. გამოძიებას წინ უძღოდა სკანდალი სექსუალური შევიწროების ბრალდებით. აღნიშნული ბრალდება გრინს ჟურნალისტმა კეიტ მოლტბიმ წაუყენა. თავად გრინი უარყოფდა სექსუალური შევიწროვების ფაქტს და ასევე, პორნოგრაფიული მასალების არსებობას თავის სამუშაო კომპიუტერში.

გამოძიების ოფიციალურ დასკვნაში ნათქვამია, რომ გრინის მიერ ნოემბერში გაკეთებული განცხადებები იმის შესახებ, თითქოს არ იცოდა პორნოგრაფიული მასალების არსებობის შესახებ, სიცრუეა. გამოძიების მიხედვით, პორნოგრაფიის შესახებ გრინისთვის ცნობილი იყო. გამოძიებამ ასევე დაასკვნა, რომ ჟურნალისტის ბრალდებები გრინის მიმართ, სიმართლეს შეესაბამება.

ოფიციალური დასკვნის გამოქვეყნების შემდეგ, გრინი იძულებელი გახდა, თანამდებობიდან გათავისუფლების თხოვნით პრემიერისთვის ოფიციალური წერილით მიემართა.

დიდი ბრიტანეთის მთავრობაში, ბოლო სამი თვის განმავლობაში, ეს უკვე მესამე მინისტრის სკანდალური გათავისუფლებაა. წინა თვეებში თანამდებობები დატოვეს თავდაცვისა და საერთაშორისო განვითარების მინისტრებმა.

დამიან გრინი ტერეზა მეის პირადი მეგობარია და წლების განმავლობაში მისი უახლოესი პოლიტიკური მოკავშირე იყო.