თურქეთში საქართველოს ელჩის, ირაკლი კოპლატაძის განმარტებით, ათათურქის აეროპორტში მომხდარი აფეთქების შედეგად დაღუპულთა და დაშავებულთა შორის საქართველოს მოქალაქეების შესახებ ცნობები ამ დრომდე არ ვრცელდება. ამის შესახებ კოპლატაძემ რუსთავი 2-თან საუბარში განაცხადა.

ელჩის განმარტებით, სულ აფეთქების შედეგად 36 ადამიანი დაიღუპა, 140-ზე მეტი კი დაშავდა, რომელთაგან 6 მძიმე მდგომარეობაშია:

"ამჟამად მიმდინარეობს იდენტიფიცირება. დაღუპულთა შორის აბსოლუტური უმრავლეოსობა უკვე იდენტიფიცირებულია და ისინი არიან თურქი მოქალაქეები. რაც შეეხება დაშავებულებს, ამ მომენტში მიმდნარეობს იდენტიფიცირება. სტამბოლში საქართველოს საკონსულოს 24 საათიანი კავშირი აქვს შესაბამის სამსახურებთან".

მისი თქმით, აფეთქების შემდეგ ათათურქის აეროპორტში 340 რეისი გაუქმდა, თუმცა ახლა ფრენები უკვე აღდგენილია:

"1500-ზე მეტი მგზავრი ელოდება გაფრენას დანიშნულებისამებრ. მათ შორის საქართველოს მოქალაქეებთან დაკავშირებით საკონსულო შესაბამის ავიაკომპანიებთან უზრუნველყოფს შემჭიდროვებულ ვადებში მათ გაფრენას ან შესაბამისი სხვა ავიაკომპანიებით მათ უზრუნველყოფას ადგილამდე".

კოპლატაძემ ასევე განმარტა, რომ ასეთ შემთხვევაში, ავიაკომპანიები მზად არიან მაქსიმალურად გასცენ შესაბამისი კომპენსაციები მგზავრებისათვის, რათა მათ ზედმეტი თანხა არ გადაიხადონ ავიაკომპანიის შეცვლის შემთხვევაში.

კოპლატაძემ ასევე განაცხადა, რომ სტამბოლი-თბილისის რეისი აფეთქებამდე ცოტა ხნით ადრე შესრულდა, მომდევნო რეისი კი დღეს დილით იყო დაგეგმილი. რაც შეეხება სტამბოლის ათათურქის აეროპორტში მყოფ საქართველოს მოქალაქეებს, მათ ქალაქის სასტუმროებში განთავსებაში თურქეთში საქართველოს საკონსულო დაეხმარა.

ათათურქის სახელობის აეროპორტში მომხდარ აფეთქებასთან დაკავშირებით საქართველოს გენერალურ საკონსულოში მოქმედებს ცხელი ხაზი: (+90 541) 818 44 00.

სტამბოლში საქართველოს გენერალური საკონსულო მუდმივ კავშირზეა თურქეთის საგანგებო სიტუაციებზე პირველადი რეაგირების ჯგუფთან.

28 ივნისს, ღამით, სტამბოლის ათათურქის სახელობის აეროპორტში, 2 აფეთქებას სულ მცირე 36 ადამიანი ემსხვერპლა 147 კი დაშავებულია. მომხდარზე ჯერჯერობით არცერთ ტერორისტულ დაჯგუფებას არ აუღია პასუხისმგებლობა.