მართლმსაჯულების ევროპულმა სასამართლომ გადაწყვიტა, რომ Uber ევროპაში ისევე უნდა დარეგულირდეს, როგორც ჩვეულებრივი ტაქსების კომპანია. უბერი ამტკიცებს, რომ ის არის ტექნოლოგიური კომპანია, რომელიც შუამავლის როლს ასრულებს მძღოლსა და მომხმარებელს შორის და შესაბამისად, უნდა დარეგულირდეს როგორც ტექნოლოგიური კომპანია და არა - როგორც ტაქსების.

უბერის წინააღდმდეგ ესპანეთის სასამართლოში ბარსელონელი ტაქსისტების გაერთიანებამ იჩივლა. მათი არგუმენტით, უბერი ჩვეულებრივ ტაქსის მომსახურებას სთავაზობს მომხმარებლებს, თუმცა არ რეგულირდება და მის მძღოლებს ტაქსისტების ლიცენზიაც კი არ აქვთ. ესპანეთის სასამართლომ საკითხი განსახილველად მართლმსაჯულების ევროპულ სასამართლოს გადასცა. აღნიშნული სასამართლო ლუქსემბურგში მდებარეობს და მის მიერ გამოტანილი გადაწყვეტილებები სავალდებულოა ევროკავშირის წევრი სახელმწიფოებისთვის.

როგორც წესი, მართლმსაჯულების ევროპულ სასამართლოს არ აქვს ეროვნული სასამართლოების ზემდგომი ინსტანციის სტატუსი. მას საქმეებს იმ დროს გადასცემენ განსახილველად, როდესაც ეროვნული სასამართლო თავად ვერ წყვეტს.

უბერი არ ეთანხმება სასამართლოს გადაწყვეტილებას, თუმცა აცხადებს, რომ აღნიშნული ბევრს არაფერს შეცვლის კომპანიისთვის, რადგან ევროპის ზოგ ქვეყანაში ის ისედაც რეგულირდება როგორც სატრანსპორტო კომპანია. საბოლოო ჯამში, ევროსასამართლოს გადაწყვეტილება უბერს უფრო მკაცრი რეგულაციების ქვეშ მოაქცევს.