თურქეთში საქართველოს საკონსულო სტამბოლის ათათურქის აეროპორტში მყოფ საქართველოს მოქალაქეებს ამ წუთებში ქალაქის სასტუმროებში განთავსებაში ეხმარება. ამის შესახებ On.ge-ს საკონსულოში განუცხადეს. მათი თქმით, საკონსულომ უკვე არაერთი მოქალაქის ზარი მიიღო, რომლებიც დღეს საქართველოში გეგმავდნენ გამომგზავრებას.

საქართველოს საკონსულოს განცხადებით, მსხვერპლთა და დაშავებულთა იდენტიფიცირება ჯერ დასრულებული არ არის, ხოლო ვისი იდენტიფიცირებაც მოხდა, მათ შორის საქართველოს მოქალაქეები არ არიან.

ათათურქის აეროპორტში 29 ივნისს მომხდარ აფეთქებას სულ მცირე 30–მდე ადამიანი ემსხვერპლა, თუმცა, ზოგიერთი წყარო, მათ შორის სააგენტო AP აცხადებს, რომ დაღუპულია 50–მდე ადამიანი, 60 კი დაშავდა. მომხდარის გამო გაუქმდა ყველა რეისი სტამბოლიდან, მგზავრები ქალაქის სასტუმროებში გადაჰყავთ ავიაკომპანიებისა და საკონსულოების თანამშრომლებს.

ათათურქის სახელობის აეროპორტში მომხდარ აფეთქებასთან დაკავშირებით საქართველოს გენერალურ საკონსულოში მოქმედებს ცხელი ხაზი: (+90 541) 818 44 00.