ამერიკული ტექნოლოგიური გიგანტი Apple მუსიკის ამოსაცნობ აპლიკაცია Shazam-ის ყიდვას აპირებს. ინფორმაციას ამის შესახებ techchurch.com ავრცელებს.

Shazam 1999 წელს დიდ ბრიტანეთში დაარსდა. კომპანიამ შეიმუშავა პროგრამა რომელიც, კომპიუტერის და სმარტფონის მფლობელებს საშუალებას აძლევს, მუსიკალური ნაწარმოების მცირე ფრაგმენტის მეშვეობით ამოიცნოს და შეიძინოს ნაწარმოები.

Shazam-ის ინფორმაციით, მათი აპლიკაციით ყოველთვიურად 100 მილიონი ადამიანი სარგებლობს. კომპანიის შემოსავლის დიდ ნაწილს Apple-ის მიერ გადარიცხული საკომოსიო თანხები წარმოადგენს.

გავლენიანი მუსიკალური გამოცემა Music Bussines Worldwide-ის ინფორმაციით, გარიგების სავარაუდო თანხა, $400 მილიონი, საგრძნობლად ჩამოუვარდა Shazam-ის კაპიტალიზაციას, რომელიც 2015 წელს, დაახლოებით, $1 მილიარდს შეადგენდა.

Shazam-ის შეძენით ამერიკული გიგანტი შეძლებს, დაზოგოს საკმაოდ დიდი თანხები იმ საკომოსიო გადარიცხვების სახით, რასაც ის დღემდე უხდის ბრიტანულ კომპანიას. გარიგებამ, შესაძლოა, მნიშვნელოვნად დააზარალოს Apple-ის კონკურენტი სხვა მუსიკალური მაღაზიები, კერძოდ, Spotify და Google Play Music. თუ გარიგება შედგა, Shazam მომხმარებლებს აღარ გადაამისამართებს სხვა მუსიკალურ მაღაზიებში, გარდა iTuns-ისა.

ამ დროისათვის Apple-ის მუსიკალური მაღაზია iTunes 27 მილიონი მომხმარებლით მნიშვნელოვნად ჩამორჩება Spotify-ის, რომელსაც 60 მილიონი გამომწერი ჰყავს.