ინციდენტების პრევენციისა და მათზე რეაგირების ჯგუფი შეხვედრას 6 ივლისს გალში გამართავს, განხილვის მთავარი საკითხი კი გიგა ოთხოზორიას მკვლელობა იქნება. ქართული მხარე განმარტავს, რომ შეხვედრაზე ყურადღებას ოთხოზორიას მკვლელობაში ბრალდებულის დაკავებაზე გაამახვილებენ.

შერიგებისა და სამოქალაქო თანასწორობის საკითხებში სახელმწიფო მინისტრის მოადგილის, ქეთევან ციხელაშვილის თქმით, ქართული მხარის მთავარი მოთხოვნაა, დამნაშავის შესაბამისად დასჯაა:

"ე.წ. აფხაზური პროკურატურის მიერ გავრცელებული ინფორმაციითაც ოთხოზორიას მკვლელობა განზრახ მკვლელობად არის შეფასებული, რაც ადასტურებს, რომ თვითონვე დე-ფაქტო სტრუქტურები აღიარებენ, რომ უმძიმესი დანაშაულია ჩადენილი და შესაბამისად შემდგომ რა ინფორმაციაც ვრცელდება, ე.წ. შინაპატიმრობის შესახებ, არაადეკვატური ზომაა, ცხადია.".

მისი თქმით, 27 მაისს ქართულმა მხარემ უკვე გააჟღერა პოზიცია იმასთან დაკავშირებით, რომ დამნაშავე ქართული მართლმსაჯულებისათვის გადმოეცათ, თუმცა უშედეგოდ.

19 მაისს ზუგდიდის რაიონის სოფელ ხურჩაში, საოკუპაციო ხაზის მიმდებარედ, გალის რაიონის სოფელ ბარღების მკვიდრი გიგა ოთხოზორია მოკლეს.

23 ივნისს კი, დე-ფაქტო აფხაზეთის სამხედრო სასამართლომ არ დააკმაყოფილა ადგილობრივი სამხედრო პროკურატურის მოთხოვნა გიგა ოთხოზორიას მკვლელობაში ბრალდებულ რაშიდ კანჯი ოღლისთვის წინასწარი პატიმრობის შეფარდების შესახებ. სასამართლომ ოთხოზორიას მკვლელობაში ბრალდებულს მხოლოდ შინაპატიმრობა შეუფარდა.