ვანო მერაბიშვილი ბოიკოტის რეჟიმში გადადის და ადვოკატები საერთო სასამართლოებში მიმდინარე ყველა პროცესს ჩამოშორდებიან. მერაბიშვილის ადვოკატმა, გიორგი ჩივიაშვილმა რუსთავი 2-ს უთხრა, რომ ყოფილი პრემიერ-მინისტრი და შინაგან საქმეთა მინისტრი პოლიტპატიმარია და ქართულ მართლმსაჯულებას ბოიკოტს უცხადებენ.

"ის არის აღიარებული პოლიტპატიმარი, შესაბამისად, ამ დარღვევებში მონაწილეობდა საქართველოს ხელისუფლება, პროკურატურა, სასამართლო, ჩვენ მათ მიმართ ნდობის მანდატი აღარ გვაქვს. აქედან გამომდინარე, მერაბიშვილი ბოიკოტის რეჟიმში გადავიდა, გადავდივართ ბოიკოტის რეჟიმში და უნდობლობას ვუცხადებთ ქართულ მართლმსაჯულებას", - განაცხადა ჩივიაშვილმა.

სტრასბურგის გადაწყვეტილება

სტრასბურგის ადამიანის უფლებათა ევროპული სასამართლოს დიდმა პალატამ, 17 მოსამართლის შემადგენლობით, ძალაში დატოვა პალატის გადაწყვეტილება და ვანო მერაბიშვილის საქმეზე დაადგინა ევროკონვენციის მე-18 მუხლის დარღვევა, მე-5 მუხლთან ერთად.

სტრასბურგის სასამართლოს დიდმა პალატამ საქმის განხილვა საქართველოს საჩივრის საფუძველზე დაიწყო. იუსტიციის სამინისტრომ ვანო მერაბიშვილის საქმეზე, გასულ წელს, ამავე სასამართლოს ერთ-ერთი პალატის 14 ივნისს გამოტანილი გადაწყვეტილება გაასაჩივრა.

14 ივნისს, ევროპულმა სასამართლომ დაადგინა, რომ დაირღვა ადამიანის უფლებათა კონვენციის მე-18 მუხლი, მე-5 მუხლის პირველ ნაწილთან ერთად. მერაბიშვილის იმჟამიდელი ადვოკატი, ოთო კახიძე განმარტავდა, რომ კონვენციის მე-18 მუხლს მეხუთესთან ერთად ადგენენ მაშინ, როდესაც დისკრიმინაციული მოტივით ხდება პატიმრობის შეფარდება.

ნაციონალური მოძრაობის წევრის, სალომე სამადაშვილის თქმით, სტრასბურგის სასამართლოს გადაწყვეტილების საპასუხოდ ხელისუფლებამ ვანო მერაბიშვილი უნდა გაათავისუფლოს, რადგან სტრასბურგმა დაადგინა, რომ ის პოლიტპატიმარია.

დევნილთა მინისტრი, სოზარ სუბარი ვანო მერაბიშვილის საქმეზე ევროსასამართლოს დიდი პალატის გადაწყვეტილებას გამოეხმაურა და თქვა, რომ ის არანაირად არ ეხება პატიმრობის კანონიერებასა და მერაბიშვილის გათავისუფლების საფუძველს ქმნის.

იუსტიციის მინისტრმა თეა წულუკიანმა კი განაცხადა, რომ მერაბიშვილისთვის სამართლებრივად არაფერი შეიცვლება გარდა იმისა, რომ კომპენსაციას გადავუხდით.