საქართველოს კომუნიკაციების ეროვნულმა კომისიამ ტელეკომპანიები რუსთავი 2 და იმედი წინასაარჩევნო პერიოდის განმავლობაში დებატებში შენების მოძრაობის არ მიწვევის გამო გააფრთხილა. ინფორმაცია კომისიის პრესსამსახურმა დღეს, 17 ნოემბერს გაავრცელა.

კომისიის განმარტებით, მათ წინასაარჩევნო პერიოდში შენების მოძრაობამ აცნობა, რომ ტელეკომპანიებს, როგორც კვალიფიციურმა სუბიექტმა დებატებში მონაწილეობის სურვილით მიმართა, თუმცა რუსთავი 2-მა და იმედმა მოთხოვნა არ დააკმაყოფილეს.

კომისიის მიერ გავრცელებული ინფორმაციით, ტელეკომპანია იმედმა განუმარტა, რომ შენების მოძრაობასთან შეთანხმდნენ პროგრამის სხვა გადაცემაში პრეზენტაციასთან დაკავშირებით. ტელეკომპანია რუსთავი 2-მა კი აღნიშნა, რომ საეთერო ბადის დაგეგმარებიდან გამომდინარე, შეუძლებელი იყო ყველა კვალიფიციური სუბიექტის მიწვევა წინასაარჩევნო დებატებში და სტუმრების შერჩევისას ტელეკომპანია საზოგადოებრივი აზრის კვლევებს დაეყრდნო.

ტელეკომპანიების მიერ კომისიისთვის მიწოდებული განმარტებები საკმარისი არ აღმოჩნდა. კომისიის დასაბუთებით, კანონი პირდაპირ მიუთითებს, რომ მაუწყებლებმა უნდა უზრუნველყონ არადისკრიმინაციულად ყველა კვალიფიციური საარჩევნო სუბიექტის თანაბარი მონაწილეობა დებატებში.