საქართველოს ფინანსთა მინისტრის თანამდებობაზე წარდგენილი მამუკა ბახტაძე ამბობს, რომ უწყებას მჭიდრო ურთიერთობა ექნება ქართულ ბიზნესთან, განსაკუთრებული ფოკუსი კი საშუალო და მცირე მეწარმეებთან ურთიერთობაზე იქნება.

"ფინანსთა სამინისტრო არის წარმატებული უწყება და შესაბამისად, ეს ჩემთვის ორმაგი პასუხისმგებლობაა. ჩვენს პარტნიორებთან რვა ძირითადი საბიუჯეტო პარამეტრი შეთანხმებულია და ეს გეზი გაგრძელდება. მთავარი პრიორიტეტი, როგორც თქვენ აღნიშნეთ, იქნება ნაკლები ბიუროკრატია და მეტი ეფექტურობა", - აღნიშნა ბახტაძემ.

ფინანსთა მინისტრის თანამდებობაზე ბახტაძე დღეს, 13 ნოემბერს, საქართველოს პრემიერ-მინისტრმა დაასახელა. ბახტაძე მანამდე საქართველოს რკინიგზის დირექტორად მუშაობდა.