საქართველოს უზენაესი სასამართლო აცხადებს, რომ უზენაესი სასამართლოსა და იუსტიციის უმაღლესი საბჭოს თავმჯდომარე ნინო გვენეტაძე ჩვეულ რეჟიმში აგრძელებს მუშაობას.

გუშინ, 9 ნოემბერს ზოგიერთმა მედიასაშუალებამ გაავრცელა ინფორმაცია, რომ ნინო გვენეტაძე შესაძლოა გადადგეს, ზოგმა კი მტკიცებით ფორმატში აღნიშნა, რომ მან თანამდებობა დატოვა. მიზეზს კი მოსამართლეთა უვადო დანიშვნას უკავშირებდნენ, რასაც თითქოს გვენეტაძე ხელს არ აწერდა.

ნინო გვენეტაძემ, რომელიც ასევე არის იუსტიციის უმაღლესი საბჭოს თავმჯდომარე, 9 ნოემბერს ხელი მოაწერა იუსტიციის უმაღლესი საბჭოს გადაწყვეტილებას 34 მოსამართლის თანამდებობაზე უვადოდ გამწესების შესახებ.

სასამართლოს ცნობით, ნინო გვენეტაძემ იუსტიციის უმაღლესი საბჭოს წევრებთან დახურულ ფორმატში გამართა შეხვედრა, რომელსაც ესწრებოდნენ თანამდებობაზე უვადოდ გამწესებული მოსამართლეები და ასევე, ის მოსამართლეებიც, რომლებიც არ დაუნიშნავთ უვადოდ.