საქართველოს პრეზიდენტმა გიორგი მარგველაშვილმა პოლონეთში ვიზიტისას განაცხადა, რომ NATO-მ და ევროკაშვირმა კარი უნდა გაუღოს იმ ქვეყნებს, რომელთა მოქალაქეებიც მსოფლიო უსაფრთხოების უზრუნველყოფაში არიან ჩართულნი.

პრეზიდენტის ადმინისტრაციის ინფორმაციით, მან განაცხადა, რომ საქართველო, რომელიც აღმოსავლეთ ევროპის ქვეყანაა, ცენტრალური ევროპის ქვეყნებთან ერთად "ცდილობს და ფიქრობს" ააშენოს უფრო დაცული და უსაფრთხო ევროპა:

"საქართველოს შეაქვს პოზიტიური წვლილი ევროპის და მსოფლიოს სტაბილურობის გაძლიერებაში და ევროკავშირსაც და ნატოსაც უნდა ჰქონდეს მიმღებლობა ისეთი ქვეყნებისა, რომლის მოქალაქეებიც იცავენ მსოფლიო სტაბილურობასა და უსაფრთხოებას".

საქართველოს პრეზიდენტმა გიორგი მარგველაშვილმა პოლონეთში ოფიციალური ვიზიტის ფარგლებში, მონაწილეობა მიიღო ვარშავის უსაფრთხოების ფორუმში, რომელშიც საქართველო სპეციალური სტუმარი ქვეყნის სტატუსითაა წარმოდგენილი.