1-ელ ოქტომბერს გამართულ სხდომაზე კომუნიკაციების კომისიამ ტელეკომპანია "ფორმულა" ქართული ოცნებისთვის მიუღებელი სიტყვებისა და ფრაზების გამოყენებისთვის უკვე მესამედ, 10 000 ლარით დააჯარიმა.

როგორც TI წერს, საერთო ჯამში ბოლო 6 თვეში კომისიამ კრიტიკულ ტელევიზიებს ტელეკომპანია "პირველსა" და "ფორმულას" ამ მიზეზით მოხსენებითი ბარათები უკვე 7-ჯერ შეუდგინა. სიტყვიერი გაფრთხილების შემდეგ ჯარიმები 2500 და 5000 ლარს შეადგენდა შემდეგ კი 10 000 ლარამდე გაიზარდა.

რა სიტყვებს ედავება კომისია მედიას?

TI-ის ცნობით, კომისია კრიტიკულ მაუწყებლებს ჯამში 101 სიტყვისა ან/და ფრაზის გამოყენებას უკრძალავს, აქედან 33-ს "ტელეკომპანია პირველს", 68-ს კი — "ფორმულას". გარკვეულ შემთხვევებში, ორი კრიტიკული მაუწყებლისთვის აკრძალული სიტყვებისა და ფრაზების ნაწილი ერთმანეთს კვეთს. ჯამში, კომისია 93 განსხვავებული სიტყვისა და ფრაზის გამოყენებას კრძალავს.

გრაფიკი #1: კომუნიკაციების მიერ კრიტიკული მაუწყებლებისთვის აკრძალული სიტყვები და ფრაზები

გრაფიკი #1: კომუნიკაციების მიერ კრიტიკული მაუწყებლებისთვის აკრძალული სიტყვები და ფრაზები

კომისიის მიერ კრიტიკული ტელევიზიებისთვის აკრძალულ სიტყვებსა და ფრაზებს შორისაა: "რეჟიმი", "ოლიგარქი", "ცრუ მოწმე პოლიციელები", "ივანიშვილის პრემიერი", "ე.წ. განათლების რეფორმა", "ქართული ოცნების პოლიცია", "ოცნების ხელისუფლება", "რეჟიმის სასამართლო", „ივანიშვილის პრეზიდენტი“, "ოცნების სუსი", "სასამართლო კლანი" და ა.შ.

კომისიის მიერ კრიტიკული მაუწყებლებისთვის აკრძალული სიტყვებისა და ფრაზების სრული ჩამონათვალში ვნახეთ ისეთი სიტყვები ფრაზები, როგორებიცაა:

"რეპრესია", "უკანონო პატიმრობა", "საკუთარი პროპაგანდისტები", "პროსამთავრობო რუსთავი 2", "პოლიტიკური ტყვეები", "პროპაგანდისტული რუპორები", "სქროლვა-სქრინვის სამმართველო", "რეპრესიული ნორმები", "რეპრესიული კანონები", "ქართული ოცნებისა და მისი სატელიტის — ხალხის ძალის", "სინდისის პატიმრები" და ა.შ.

გარდა კონკრეტული სიტყვებისა და ფრაზების აკრძალვისა, კომუნიკაციების კომისია კრიტიკულ მაუწყებლებს ამბების მშრალად, შეფასებისა და ანალიზისგან სრულად დაცლილად გაშუქებას სთხოვს.

"კომუნიკაციების კომისია არ უნდა ოპერირებდეს ცენზორის პოზიციიდან და ის არ უნდა იყოს გამოყენებული კრიტიკული მაუწყებლების დასჯის მექანიზმად. ხოლო საერთაშორისო პრაქტიკის გათვალისწინებით, სადავო საკითხები თვითრეგულირების მექანიზმების ფარგლებში უნდა იხილებოდეს. სწორედ ამ უკანასკნელის წახალისება და ხელშეწყობა უნდა იყოს კომუნიკაციების კომისიის მთავარი მიზანიც და არა ქართული ოცნების ინტერესების სამსახურში ჩადგომა და მაუწყებლების დასჯა მმართველი პარტიის წარმომადგენლების კრიტიკისა და მხილებისთვის", — წერს TI.