ციხიდან გაყვანის საქმეზე, სასჯელაღსრულების მე-9 დაწესებულებაში ვანო მერაბიშვილის დაკითხვა მიმდინარეობს. მისი ადვოკატი ოთო კახიძე რუსთავი 2-თან ინტერვიუში აცხადებს, რომ ახლა უკვე დაკითხვის ოქმშიც დაფიქსირდება ყველა ის გარემოება, რაც მერაბიშვილმა სასამართლოზე მოყვა:

"რა თქმა უნდა, სტრასბურგის სასამართლოს გადაწყვეტილებას ვადა არ გასდის და ეს საქმე აუცილებად იქნება გამოძიებული".

ვანო მერაბიშვილის წინასწარი პატიმრობის პერიოდში, მისი ციხიდან გაყვანის ფაქტზე, პროკურატურამ 21 ივნისს დაიწყო გამოძიება.

გამოძიება დაწყებულია საჯარო მოხელეთა სამსახურებრივი უფლებამოსილების შესაძლო გადამეტების ფაქტზე, სისხლის სამართლის კოდექსის 333-ე მუხლის პირველი ნაწილით გათვალისწინებული დანაშაულებრივი ნიშნებით.

ადამიანის უფლებათა ევროპულმა სასამართლომ 2016 წლის 14 ივნისს გამოტანილ გადაწყვეტილებაში აღნიშნა, რომ ვანო მერაბიშვილის მიმართ ქართულმა სახელმწიფომ დაარღვია კონვენციის მეხუთე მუხლის მესამე პუნქტი და მე-18 მუხლი პირველთან მიმართებით. აღნიშნული ეხება სწორედ მერაბიშვილის ციხიდან გაყვანის გამოუძიებლობას სახელმწიფო სტრუქტურების მიერ.