ანკარის სასამართლომ კაცს ცოლისთვის ქალწულობის ცნობის იძულებით მოთხოვნის გამო, კომპენსაციის სახით, 20 ათასი (13,561 ლარი) თურქული ლირის გადახდა დააკისრა. ამის შესახებ, თურქული გამოცემა Hurriyet Daily News წერს.

შემთხვევა 2016 წლის მაისში მოხდა, როდესაც კაცმა, თავის ოჯახთან ერთად, ცოლი ქორწილამდე ქალიშვილობის დაკარგვაში დაადანაშაულა.

ამის შემდეგ, ქმრის ოჯახმა ქალი მამის ოჯახში დააბრუნა და ოფიციალურად მოითხოვა განქორწინება.

ქალის ადვოკატმა, მაჰმუტ ასლანმაც ასევე შეიტანა საბუთები განქორწინებისთვის იმ საფუძვლით, რომ განქორწინების კანონში არ არსებობს ისეთი მუხლი, როგორიცაა "ქალწულობა, როგორც აუცილებელი საჭიროება". გარდა ამისა, მან ქალისთვის კომპენსაციის მიზნით 200 ათასი ლირის გადახდა მოითხოვა.

ქალის ადვოკატი აღნიშნავს, რომ მისი კლიენტი ქალწული იყო და ქორწინების მიუხედავად, ქმართანაც კი არ ჰქონია სექსი. მოსამართლემ დააკმაყოფილა ქალის მოთხოვნა განქორწინებაზე. მანამდე კი, ქმარმაც მოითხოვა განქორწინება, მაგრამ უარი უთხრა საფუძვლის არარსებობის გამო. ქმარი განქორწინების მიზეზად ცოლის მიერ ქორწილამდე ქალიშვილობის დაკარგვას ასახელებდა. სასამართლომ ეს არგუმენტი არ გაიზიარა.

სასამართლომ კაცს 350 (237 ლარი) ლირის გადახდა დააკისრა ალიმენტის სახით და 15 000 (10,171 ლარი) ლირის გადახდა კომპენსაციისთვის, რათა ქალს ახალი ცხოვრების დაწყების საშუალება ჰქონდეს.

დამატებით, კაცს ასევე დაევალა 20 000 ლირა გადაუხადოს ყოფილ ცოლს ქალწულობის ცნობის მოთხოვნისთვის, სახლიდან გაგდებისა და მისთვის ტკივილის მიყენებისთვის.