მთავარი პროკურორის მოადგილე გიორგი გაბიტაშვილის ინფორმაციით, საარჩევნო პერიოდში მთლიანად 47 საქმეზე დაიწყო გამოძიება. ამის შესახებ მან სამართლიანი არჩევნებისთვის უწყებათაშორისი კომისიის სხდომაზე განაცხადა. სხდომა წინასაარჩევნო და საარჩევნო პერიოდში სავარაუდო დარღვევებს ეხებოდა.

ყველაზე მეტი გამოძიება დაიწყო თბილისში 21 საქმეზე. ასევე 7 საქმეზე დაიწყო გამოძიება ქვემო ქართლში, შიდა ქართლში 3 საქმეზე, დასავლეთ საქართველოში 4 საქმეზე, აჭარაში 5 საქმეზე, სამეგრელოში 2 საქმეზე, კახეთში 1 საქმეზე, სამცხე-ჯავახეთში 4 საქმეზე.

ანგარიშის თანახმად, 9 საქმეზე გამოძიება მტკიცებულების არარსებობის გამო შეწყდა, 3 საქმეზე კი მიმდინარეობს სისხლისსამართლებრივი დევნა 7 პირის მიმართ.

უწყებათაშორისი კომისიის წევრების ინიციატივით მომზადდება რეკომენდაცია, რომელშიც ნათქვამი იქნება, რომ სამაგიდო სიები არ უნდა იქნეს გამოყენებული პოლიტიკური პარტიების წარმომადგენელთა, მათ წარმომადგენელთა და სხვადასხვა დამკვირვებლის მიერ იმის გადასამოწმებლად, თუ ვინ იყო უბანზე მოსული და დააფიქსირა თავისი არჩევანი.