ესპანეთის მოსამართლემ კატალონიის ყოფილი პრეზიდენტის, კარლეს პუჩდემონის დაკავების საერთაშორისო ორდერი გამოსცა.

პუჩდემონი, რომელიც კატალონიის ლეგიტიმურ მმართველად მიიჩნევს თავს, ამჟამად ბელგიაშია. ის ამბობს, რომ ესპანეთის სასამართლო სისტემას არ გაურბის, არამედ რეგიონის დამოუკიდებლობის საკითხში ევროპის მხარდაჭერის იმედი აქვს.

ორდერი უკვე გადაეგზავნა ბელგიის პროკურატურას. უწყების წარმომადგენელმა CNN-ს უთხრა, რომ დოკუმენტს შეისწავლიან და სამი დღის ვადაში გამომძიებელ მოსამართლეს გადაეცემა.

კატალონიის დამოუკიდებლობის რეფერენდუმის და საკონსტიტუციო კრიზისის შემდეგ ესპანეთის პრემიერ-მინისტრმა მარიანო რახოიმ რეგიონს ავტონომია ჩამოართვა და პირდაპირი მმართველობა დაიწყო. რახოიმ დაითხოვა კატალონიის რეგიონული პარლამენტი და ვადამდელი არჩევნები 21 დეკემბერს დანიშნა.

პუჩდემონის დაკავების ორდერის გამოცემამდე, ესპანეთის სასამართლომ კატალონიის რვა ყოფილი მინისტრის დაკავების განკარგულება გასცა. ბრალდებულებს ამბოხება, აჯანყებისკენ მოწოდება და სახელმწიფო სახსრების ბოროტად გამოყენება ედებათ ბრალად.

გაიგეთ მეტი: კატალონიის კრიზისი - დეტალები მოკლედ