კატალონიის რეგიონის ყოფილი ლიდერი, კარლეს პუჩდემონი მოითხოვს, რომ მთავრობის ყოფილი წევრები გაათავისუფლონ. კატალონიის დამოუკიდებლობის საქმეზე, რეგიონის რვა ყოფილ მინისტრს დააკავეს. ბრიუსელში პუჩდემონმა განაცხადა, რომ მსგავსი ქმედება 21 ოქტომბრის ვადამდელ არჩევნებს საფრთხეს შეუქმნის.

კარლეს პუჩდემონისა და კატალონიის მთავრობის ყოფილი წევრების მიმართ დაწყებულია სისხლის სამართლის გამოძიება. მათ აჯანყება, აჯანყებისაკენ მოწოდება და სახელმწიფო სახსრების ბოროტად გამოყენება ედებათ ბრალად. შესაბამისი გადაწყვეტილება ესპანეთის სასამართლომ გამოიტანა.

რეგიონის ექს-ლიდერი ორშაბათს ბრიუსელში გაემგზავრა. მისი თქმით, ის არ აპირებს პოლიტიკური თავშესაფრის მოთხოვნას და საჭიროების შემთხვევაში მზადაა ესპანეთში სასამართლოს წინაშე წარსდგეს, თუმცა დარწმუნებული არაა, რომ ის მიუკერძოებლად წარიმართება. ბელგიის ფედერალური პროკურორის განცხადებით, შესაბამისი დოკუმენტის მიღებისთანავე, პუჩდემონს კანონის მიხედვით დააკავებენ.

კატალონიის დამოუკიდებლობის რეფერენდუმის და საკონსტიტუციო კრიზისის შემდეგ ესპანეთის პრეზიდენტმა მარიანო რახოიმ რეგიონს ავტონომია ჩამოართვა და პირდაპირი მმართველობა დაიწყო. რახოიმ დაითხოვა კატალონიის რეგიონული პარლამენტი და ვადამდელი არჩევნები 21 დეკემბერს დანიშნა.

გაიგეთ მეტი: კატალონიის კრიზისი - დეტალები მოკლედ