საქართველოს პროკურატურის ინფორმაციით, უზენაესმა სასამართლომ პარლამენტის წევრ ვალერი გელაშვილზე განხორციელებული თავდასხმის ფაქტზე მსჯავრდებულის, შინაგან საქმეთა ყოფილი მინისტრის ივანე მერაბიშვილის მიმართ 2017 წლის 23 თებერვალს გამოტანილი გამამტყუნებელი განაჩენი ძალაში დატოვა.

გელაშვილზე განხორციელებული თავდასხმისთვის სააპელაციო სასამართლომ შინაგან საქმეთა ყოფილი მინისტრი ივანე მერაბიშვილი დამნაშავედ სცნო, სასჯელის ზომად კი თავისუფლების აღკვეთა ექვსი წლისა და ცხრა თვის ვადით განუსაზღვრა. ამავე დროს, თანამდებობის დაკავების უფლება ორი წლითა და სამი თვით ჩამოერთვა.

გამოძიება მიმდინარეობდა სისხლის სამართლის კოდექსის 333-ე მუხლის მე-3 ნაწილის "ბ" ქვეპუნქტით, 25,117-ე მუხლის მეხუთე ნაწილის "ე" ქვეპუნქტით, რაც სამსახურებრივი უფლებამოსილების გადამეტებასა და ჯანმრთელობის განზრახ მძიმე დაზიანებას გულისხმობს.

პროკურატურის მტკიცებით, 2005 წლის 29 ივნისს გაზეთ რეზონანსში ვალერი გელაშვილის სტატიის გამოქვეყნების შემდეგ, რომელშიც ის იმჟამინდელ პრეზიდენტ მიხეილ სააკაშვილის მიმართ უკმაყოფილებას გამოთქვამდა, სააკაშვილმა მერაბიშვილს სტატიის ავტორის მიმართ ფიზიკური ანგარიშსწორება დაავალა.

უწყებაში ამბობენ, რომ ვანო მერაბიშვილმა მიღებული დავალება სპეციალური ოპერატიული დეპარტამენტის დირექტორის, ერეკლე კოდუას დახმარებით შეასრულა.

"გაიტაცეს ვალერი გელაშვილის კანონიერ მფლობელობაში არსებული Heckler Koch-ის მარკის ცეცხლსასროლი იარაღი, ფულადი თანხა - 10 ათასი დოლარი და 50 ათას ლარად ღირებული ბეჭედი. ცემის შედეგად ვალერი გელაშვილმა მიიღო სიცოცხლისთვის სახიფათო სხეულის მძიმე ხარისხის დაზიანება", - ნათქვამია განცხადებაში.

პროკურატურის ინფორმაციით, ივანე მერაბიშვილის მსგავსი განაჩენით დამნაშავედ იქნენ ცნობილი სოდ-ის ყოფილი დირექტორი ერეკლე კოდუა და ამავე დეპარტამენტის სამმართველოს ყოფილი უფროსის გია სირაძე. თითოეულს თავისუფლების აღკვეთა ცხრა წლით მიუსაჯეს. მათვე 2 წლისა და 3 თვის ვადით ჩამოერთვათ თანამდებობის დაკავების უფლება.

პროკურატურის ინფორმაციით, თბილისის საქალაქო სასამართლო გელაშვილის საქმეზე ორგანიზების ბრალდებით მიხეილ სააკაშვილი საქმეს არსებითად განიხილავს.