ადვოკატ ტარიელ კაკაბაძის განცხადებით, საქმის დეტალების შესწავლის შემდეგ კიდევ უფრო ეჭვქვეშ დგება ვერსია იმის შესახებ, თითქოს 12 წლის წინ მლეთაში გაუჩინარებული გურამ დადიანიძე მეწყერში მოჰყვა.

"წლების განმავლობაში ვრცელდებოდა ვერსია, თითქოს მეწყერი ჩამოწვა და გურამ დადიანიძე მასში მოჰყვა. რაც უფრო ღრმად მივდივართ ამ საქმის გამოძიებაში, მით უფრო გამოირიცხება მეწყრის ვერსია. ჩემი შეფასებით, ვიღაცის ინტერესში შედიოდა გამოძიების მიჩქმალვა, საგამოძიებო მოქმედებების შეჩერება და ჭეშმარიტების უგულებელყოფა," — განაცხადა კაკაბაძემ.

ადვოკატმა სოციალურ ქსელში გავრცელებულ ვიდეოზე განაცხადა, რომ "ვიდეოს შინაარსი თავდაყირა აყენებს ძალიან ბევრ საკითხს და შინაარსობრივად ეწინააღმდეგება მოწმეთა გამოკითხვის ოქმებს".

"რაც შეეხება გასაჯაროებულ ვიდეოს, გამოკითხულია ის პიროვნება, ვინც გადაიღო და ატვირთა Youtube-ში. აღნიშნული ვიდეოს შინაარსი თავდაყირა აყენებს ძალიან ბევრ საკითხს და შინაარსობრივად ეწინააღმდეგება მოწმეთა გამოკითხვის ოქმებს. ეს საჭიროებს დამატებით შესწავლას. ძალიან ბევრი ახალი გარემოება გამოჩნდა აღნიშნული ჩანაწერით," — აღნიშნა ადვოკატმა.

აღნიშნული ვიდეო სოციალურ ქსელში ადვოკატმა ტარიელ კაკაბაძემ გაავრცელა. ჩანაწერში, სავარაუდოდ, ისმის სიტყვები: "არ მიმატოვო, გეხვეწები". დაკარგული ბიჭის დედის მტკიცებით, ეს მისი შვილის ხმაა.

უწყების ცნობით, სოციალურ ქსელში გავრცელებული ვიდეო, რომელიც გურამ დადიანიძის გაუჩინარების დღესაა გადაღებული, შუადღის საათებს ასახავს, გამოკითხვის თანახმად კი არასრულწლოვანი ღამის საათებში გაუჩინარდა.

10 აგვისტოს შინაგან საქმეთა სამინისტრომ უარყო დადიანიძის დედის ბრალდება, თითქოს საქმე ჯეროვნად არ გამოუძიებიათ. შსს-ს ცნობით, აღნიშნულ საქმეზე ბოლო ერთი თვის განმავლობაში 20-ზე მეტი პირი გამოიკითხა და ვერანაირი საეჭვო გარემოება ვერ აღმოაჩინეს.

შეგახსენებთ, გურამ დადიანიძის გაუჩინარების საქმის ფარგლებში შსს იმ ტერიტორიის ხელახალი შემოწმება დაიწყო, საიდანაც 2014 წელს დაკარგულის კვალი გაქრა.