თბილისის საქალაქო სასამართლომ განსაკუთრებით დიდი ოდენობით ნარკოტიკული საშუალების უკანონო შეძენა, შენახვისა და საქართველოში უკანონოდ შემოტანისათვის ბრალდებულს, თბილისის საქალაქოს სასამართლომ 16 წლით თავისუფლების აღკვეთა განუსაზღვრა.

საქმის მასალების თანახმად, ბრალდებულმა დავით მ.-მ, ისრაელის ტერიტორიაზე ყოფნისას, უკანონოდ შეიძინა და შეინახა 0,4144 გრამი ბუპრენორფინი, რომელიც თელავივი-სტამბოლი-თბილისის რეისით, თბილისის აეროპორტის გავლით 16 თებერვალს შემოიტანა საქართველოში:

ბრალდების მხარის მიხედვით, სამართალდამცველებმა ის საავადმყოფოს ადმინისტრაციულ შენობაში გადაიყვანეს შესამოწმებლად, სადაც მისი სხეულიდან ამოიღეს ნარკოტიკული საშუალება ბუპრენორფინის შემცველი, გამჭვირვალე პოლიეთილენის ნაჭერში შეფუთული, 52 ცალი ტაბლეტი.

სასამართლოს მიერ გავრცელებულ განცხადებაში ვკითხულობთ, რომ ბრალდებულმა ნაწილობრივ აღიარა ბრალად შერაცხული ქმედების ჩადენის ფაქტი და არ დაეთანხმა, საქართველოს საზღვარზე განსაკუთრებით დიდი ოდენობით ნარკოტიკული საშუალების უკანონოდ შემოტანის ბრალდების ნაწილს.

განსაკუთრებით დიდი ოდენობით ნარკოტიკული საშუალების უკანონო შეძენა, შენახვისათვის საქართველოს სისხლის სამართლის კოდექსით გათვალისწინებულია თავისუფლების აღკვეთა 8-დან 20 წლამდე ვადით ან უვადოდ, ხოლო განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანისათვის კანონმდებლობა სასჯელის სახედ 15-დან 20 წლამდე, ან უვადოდ თავისუფლების აღკვეთას ითვალისწინებს.