ირანელ მომღერალ პარასთუ ახმადის და მისი შემოქმედებითი გუნდის რვა წევრს 74-74 როზგი მიესაჯათ. The Guardian-ის ცნობით, სასამართლო გადაწყვეტილების მიზეზი 2024 წელს YouTube-არხზე ჰიჯაბის გარეშე ჩატარებული კონცერტი გახდა.

ყომის პროვინციის სისხლის სამართლის სასამართლოს გადაწყვეტილებით, როზგის გარდა, მუსიკოსებს ორი წლით ქვეყნის დატოვება და შემოქმედებითი საქმიანობის განხორციელება აეკრძალათ. მათ ბრალად "ვულგარული და ამორალური კონტენტის" გავრცელებით საზოგადოებრივი ზნეობის შეურაცხყოფა ედებათ.

2024 წლის დეკემბერში 29 წლის პარასთუ ახმადიმ პირდაპირ ეთერში, ჰიჯაბის გარეშე, პატრიოტული სიმღერა Az Khoone Javanane Vatan ("სამშობლოს ახალგაზრდობის სისხლიდან") შეასრულა, რამაც ინტერნეტში მილიონობით ნახვა დააგროვა. ვიდეოს გავრცელების შემდეგ მომღერალი და მუსიკოსები დროებით დააკავეს, მოგვიანებით კი მათ წინააღმდეგ ოფიციალური საქმე აღძრეს.

უფლებადამცველი ორგანიზაციების შეფასებით, ეს შემთხვევა ირანის ხელისუფლების მხრიდან კულტურული პროტესტის ჩახშობის კიდევ ერთი მაგალითია.