"არსებული მიწისქვეშა კომუნიკაციები არის ამორტიზებული, არის მოძველებული...ისეთი მდგომარეობაა, რომ მართლაც კრიტიკას ვერ უძლებს", — ამის შესახებ თბილისის მერმა, კახა კალაძემ თბილისის მთავრობის სხდომაზე ისაუბრა. მისი განცხადებით, ქალაქის უმეტეს ნაწილში არსებული მიწისქვეშა კომუნიკაციები ამორტიზებულია, თუმცა მერია პრობლემების მოგვარებას ეტაპობრივად განაგრძობს.

"ახლა გვაქვს კონკრეტული ქუჩები, სადაც, მაგალითად, სანიაღვრე ქსელები საერთოდ არ არსებობს, თუმცა უმეტესობა ქუჩებისა და გამზირებისა — არსებული მიწისქვეშა კომუნიკაციები არის ამორტიზებული, არის მოძველებული... აი, ისეთი მდგომარეობაა, რომ მართლაც კრიტიკას ვერ უძლებს. შესაბამისად, ეტაპობრივად მივყვებით და ყველაფერს განვაახლებთ, ყველაფერს მოვაწესრიგებთ.

ცხადია, ერთი ხელის მოსმით ეს ყველაფერი ვერ გაკეთდება, იმიტომ რომ ძალიან დიდ თანხებზეა აქ საუბარი, ძალიან დიდი თანხებია საჭირო. შესაბამისად, მუნიციპალიტეტში არსებობს ასევე სხვა მნიშვნელოვანი საჭიროებები და პრიორიტეტები. შესაბამისად, ეტაპობრივად ყველაფერი იქნება მოწესრიგებული და განახლებული", — თქვა კალაძემ.

მერმა განაცხადა, რომ უხვმა ნალექმა დედაქალაქის სხვადასხვა უბანში პრობლემები შექმნა და მადლობა გადაუხადა იმ სამსახურებსა და თანამშრომლებს, რომლებიც მთელი ღამის განმავლობაში მუშაობდნენ ქუჩების გაწმენდით სამუშაოებზე.

"გუშინდელმა ძლიერმა ნალექმა შეგვიქმნა გარკვეული პრობლემები დედაქალაქის გარკვეულ უბნებში, კონკრეტულ ქუჩებზე, კონკრეტულ უბნებში.

მე მინდა ვისარგებლო შემთხვევით, პირველ რიგში, მადლობა გადავუხადო ყველა იმ ადამიანს, ვინც ჩართული იყო გაწმენდით სამუშაოებში — მთელი ღამე მუშაობდა. მადლობა "თბილსერვის ჯგუფს", მუნიციპალიტეტის თითოეულ თანამშრომელს, გამგეობებს. გარდა ამისა, მინდა მადლობა გადავუხადო შინაგან საქმეთა სამინისტროს, საპატრულო პოლიციას, საგანგებო სიტუაციების მართვის სააგენტოს. მთელი ღამის განმავლობაში კონკრეტულ ქუჩებზე, გამზირებზე, უბნებში მიმდინარეობდა გაწმენდითი სამუშაოები და ახლაც გრძელდება ეს ყველაფერი, რათა მოწესრიგებული და დასუფთავებული იყოს ქუჩები", — განაცხადა კალაძემ.

კახა კალაძემ ასევე ხაზი გაუსვა იმ გარემოებას, რომ მოკლე დროში მოსული დიდი რაოდენობის წვიმა მხოლოდ თბილისის გამოწვევა არ არის. მისი თქმით, მსგავსი მოვლენები ევროპის განვითარებულ, ეკონომიკურად ძლიერ ქალაქებშიც ხდება, სადაც გამართული ინფრასტრუქტურაც კი ვერ უძლებს უეცარ, უხვ ნალექს.

"როდესაც ძალიან მოკლე დროში მოდის უჩვეულოდ დიდი რაოდენობის ნალექი, მსგავსი შემთხვევები, ბევრჯერ გვისაუბრია ამაზე, მხოლოდ თბილისში არ ხდება. ამას ვხედავთ ევროპის არაერთ დიდ ქალაქშიც, ჩვენზე უფრო ძლიერ სახელმწიფოებშიც, ეკონომიკურად უფრო ძლიერ დედაქალაქებშიც, სადაც არსებობს თანამედროვე ინფრასტრუქტურა, ყველაფერი მოწესრიგებულია, თუმცა დროის გარკვეულ მონაკვეთში მოსული უხვი ნალექი, რა თქმა უნდა, პრობლემას წარმოადგენს შესაბამისი ინფრასტრუქტურისთვის", — თქვა კახა კალაძემ.

მერის თქმით, პრობლემების არსებობა არ ნიშნავს, რომ მათ მოგვარებაზე არ უნდა იმუშაონ. 2017 წლიდან მერიამ შეცვალა მიდგომა და საგზაო სამუშაოებისას პირველი, რასაც აკეთებენ, სწორედ მიწისქვეშა კომუნიკაციებისა და სანიაღვრე ქსელების განახლებაა, განსხვავებით წინა წლებისგან, როდესაც გზებს მხოლოდ ზედაპირულად აგებდნენ. კალაძემ აღნიშნა, რომ ათწლეულების განმავლობაში მიწისქვეშა ინფრასტრუქტურის მიმართულებით პრაქტიკულად არაფერი კეთდებოდა, რის გამოც დაგროვილი პრობლემების მოგვარება ახლა მათ გვიწევთ, თუმცა პროცესი ეტაპობრივად მიმდინარეობს.

"ეს არ ნიშნავს, რომ პრობლემა არ არსებობს თბილისში, ან მის მოგვარებაზე არ უნდა ვიმუშაოთ. პირიქით, სწორედ ამიტომ, 2017 წლიდან მოყოლებული, სადაც ვიწყებთ სამუშაოებს საგზაო ინფრასტრუქტურის თვალსაზრისით, პირველი, რასაც ვაკეთებთ, ეს არის მიწისქვეშა კომუნიკაციების განახლება — სანიაღვრე სისტემების მოწყობა და ასე შემდეგ.

ჩვენ გვახსოვს, წინა წლების განმავლობაში გზებს მხოლოდ ზედაპირულად აგებდნენ, ჩვენ კი ყველა მნიშვნელოვანი ქუჩისა და გამზირის რეაბილიტაციის დროს პირველი, რასაც ვაკეთებთ, ეს არის მიწის ქვემოთ არსებული ინფრასტრუქტურის მოწესრიგება და განახლება.

სამწუხაროდ, ათწლეულების განმავლობაში ამ მიმართულებით პრაქტიკულად არაფერი არ კეთდებოდა, დღეს კი პრობლემების მოგვარება ჩვენ გვიწევს, რომლებიც წლების განმავლობაში დაგროვდა. თუმცა არაფერი არ არის საგანგაშო, ეტაპობრივად ყველაფერი იქნება მოწესრიგებული და ყველაფერი იქნება მოგვარებული", — აღნიშნა კალაძემ.

დედაქალაქის მერის თქმით, ყოველი ძლიერი წვიმა ოპონენტების მხრიდან პოლიტიკური სპეკულაციების მიზეზი ხდება, თუმცა მერიის მიზანი არა კამათი, არამედ პრობლემების რეალურად მოგვარება და ქალაქის მდგრადობის ამაღლებაა.

"სამწუხაროდ, ზოგი ადამიანისთვის ყოველი ძლიერი წვიმა პოლიტიკური სპეკულაციების მიზეზია. ჩვენი ამოცანა ნამდვილად არ არის კამათი, ჩვენი ამოცანაა პრობლემების დროულად მოგვარება და ისეთი ინფრასტრუქტურის შექმნა, რომელიც ქალაქს მომავალში კიდევ უფრო მდგრადს გახდის. და, რა თქმა უნდა, ჩვენ გავაგრძელებთ ჩვენს დამოკიდებულებას და ყველა იმ ქუჩაზე თუ გამზირზე, სადაც შევდივართ რეაბილიტაციით, პირველი ვაკეთებთ მიწისქვეშა კომუნიკაციების განახლებას. ძალიან ბევრი გვისაუბრია ამ ყველაფერთან დაკავშირებით და ეს დამოკიდებულება გაგრძელდება, რა თქმა უნდა, მომავალშიც", — განაცხადა კალაძემ.

კალაძის განმარტებით, მერიის ცხელი ხაზი უწყვეტ რეჟიმში მუშაობს და მუნიციპალიტეტი ყველა იმ მოქალაქეს დაეხმარება, ვისაც სტიქიამ სარდაფების თუ ეზოების დატბორვით ზიანი მიაყენა. მისი თქმით, ქალაქის მართვა სწორედ გამოწვევებისთვის ყოველწლიურ მზაობას ნიშნავს.

"კიდევ ერთი ძალიან მნიშვნელოვანი საკითხი გუშინ მოსულ ნალექთან დაკავშირებით: ცხელი ხაზი დღემდე მუშაობს და ნებისმიერ შემოსულ ზარს ჩვენ ვპასუხობთ და ვახდენთ შესაბამის რეაგირებას. კიდევ ერთხელ ხაზი მინდა გავუსვა იმას, რომ ყველა იმ ადამიანს დავეხმარებით, ვისაც გარკვეული პრობლემები შეუქმნა წვიმამ, იმიტომ რომ დაიტბორა სარდაფები, ეზოებში შეექმნათ პრობლემები, იყო გარკვეული მომართვიანობა სხვადასხვა რაიონებში და ჩვენი კომპეტენციისა და შესაძლებლობის ფარგლებში ყველას დავეხმარებით და ყველას გვერდით დავუდგებით.

კიდევ ერთხელ მინდა გავიმეორო, რომ ქალაქის მართვა ნიშნავს არა იმის მტკიცებას, რომ პრობლემა არ არსებობს, არამედ იმას, რომ ყოველწლიურად უფრო მომზადებული ხვდები ამ გამოწვევებს. სწორედ ამას ვაკეთებთ და ამ მიმართულებით მუშაობას კიდევ უფრო გავაძლიერებთ, რომ პრობლემები არ იყოს დედაქალაქში", — თქვა კალაძემ.

მერმა ასევე დაასახელა ნალექის მაჩვენებელი და ჩამოთვალა ის კონკრეტული ლოკაციები,რომლებიც დაიტბორა, თუმცა დასძინა, რომ პრობლემები სწრაფად აღმოიფხვრა.

"მინდა ასევე ინფორმაცია მოგაწოდოთ, ღამის საათებში მოსულ უხვ ნალექთან დაკავშირებით — თუ რა დაფიქსირდა.

მაგალითად, უნივერსიტეტის მიმდებარედ, 5 საათის განმავლობაში, სახიფათო მეტეოროლოგიური მოვლენების კატეგორიის ძლიერი ინტენსივობის ნალექი აღინიშნა. მოსული ნალექის რაოდენობამ, მათ შორის თბილისის სახელმწიფო უნივერსიტეტის ტერიტორიაზე, შეადგინა 110 მილიმეტრი, რაც ძალიან ბევრია და იმიტომ იყო კონკრეტულ უბნებში და კონკრეტულ ქუჩებზე აღნიშნული პრობლემები.

რამდენიმე ლოკაცია იყო, სადაც ყველაზე მეტი პრობლემა გამოიკვეთა: ეს იყო თამარაშვილისა და უნივერსიტეტის ქუჩის კვეთა; ეს იყო გურამიშვილის გამზირზე არსებული პრობლემა, სადაც მოხდა წყლის შეტბორვა; გარდა ამისა ეს იყო მარჯვენა სანაპირო; იყო "გუდვილის" მიმდებარე ტერიტორია; და ერისთავის მიმართულებით იყო გარკვეული პრობლემა. თუმცა ძალიან სწრაფად ყველაფერი იქნა მოწესრიგებული და შესაბამის სამსახურებს კიდევ ერთხელ ძალიან დიდი მადლობა მინდა გადავუხადო", — თქვა კალაძემ.