საქართველოს სახელმწიფო უსაფრთხოების სამსახურმა ე.წ. 4 ოქტომბრის საქმეზე ძებნილი მოქალაქე აიყვანა. უწყების ინფორმაციით, დაკავება საქართველო-სომხეთის სასაზღვრო გამშვებ პუნქტებს შორის, ნეიტრალურ ზონაში მოხდა. ოფიციალური ვერსიით, მას ბრალად დივერსიული აქტების მოწყობის მიზნით დიდი რაოდენობით იარაღისა და ასაფეთქებელი ნივთიერებების შეძენა-შენახვა ედება, რაც უწყების თქმით, გასულ წელს დაგეგმილ ჯგუფურ ძალადობასა და პრეზიდენტის სასახლის ხელში ჩაგდების მცდელობას უკავშირდებოდა.

"საქართველოს სახელმწიფო უსაფრთხოების სამსახურის სახელმწიფო უსაფრთხოების დეპარტამენტის თანამშრომლებმა კომპლექსურად ჩატარებული სპეციალური ღონისძიების შედეგად, რომელიც ბოლო 4 დღის განმავლობაში სამსახურის სხვადასხვა სტრუქტურული ერთეულების ჩართულობით მზადდებოდა, საქართველო-სომხეთის სასაზღვრო გამშვებ პუნქტებს შორის, ნეიტრალურ ზონაში დააკავეს ძებნილი საქართველოს მოქალაქე, რომელსაც ბრალად ედება 2025 წლის 4 ოქტომბერს დაორგანიზებული ჯგუფური ძალადობისა და პრეზიდენტის სასახლის ხელში ჩაგდების მცდელობის პარალელურად, დივერსიული აქტების მოწყობის მიზნით, დიდი რაოდენობით ცეცხლსასროლი იარაღი, საბრძოლო მასალისა და ასაფეთქებელი საშუალებების შეძენა-შენახვა.", — განაცხადა სუს-ის უფროსის პირველმა მოადგილემ, ლაშა მაღრაძემ.

გამოძიების თანახმად, აღნიშნული საბრძოლო მასალა და დეტონატორებიანი ასაფეთქებელი ნივთიერებები სამართალდამცველებმა გასული წლის ოქტომბერში, თბილისის მახლობლად, ტყის მასივში სპეციალურად მოწყობილ სამალავში აღმოაჩინეს. უსაფრთხოების სამსახურის მტკიცებით, დაკავებულს ეს შეიარაღება უკრაინაში მოქმედი ერთ-ერთი სამხედრო დანაყოფის ქართველი წარმომადგენლის მითითებით ჰქონდა შეძენილი და ის 4 ოქტომბრის არეულობის დროს დივერსიების მოსაწყობად უნდა გამოეყენებინათ, თუმცა პოლიციამ გეგმა ჩაშალა.

"შეგახსენებთ, რომ გასული წლის 4 ოქტომბერს, სახელმწიფო უსაფრთხოების სამსახურის თანამშრომლებმა თბილისის მახლობლად, ტყის მასივში, სპეციალურ სამალავში აღმოაჩინეს გადამალული ცეცხლსასროლი იარაღი, საბრძოლო მასალა და ასაფეთქებელი ნივთიერებები დეტონატორით.

გამოძიებით დადგენილია, რომ უკრაინაში მოქმედი ერთ-ერთი სამხედრო დანაყოფის ქართველი წარმომადგენლის მითითებით, დაკავებულს შეძენილი ჰქონდა ზემოთ ხსენებული საბრძოლო მასალა, რომლითაც 4 ოქტომბრის არეულობის ორგანიზატორებს, საჭიროების შემთხვევაში, დივერსია უნდა მოეწყოთ.

როგორც გახსოვთ, სახელმწიფო უსაფრთხოების სამსახურის თანამშრომლების მიერ გატარებული პრევენციული ღონისძიებების შედეგად, გასული წლის 4 ოქტომბერს ასევე მოხერხდა იმ პირთა წრის განეიტრალებაც, რომლებსაც, სავარაუდოდ, აღნიშნული საბრძოლო მასალა და ასაფეთქებელი ნივთიერებები თბილისის ცენტრში უნდა გადაეტანათ", — თქვა მაღრაძემ.

ბრალდებულს საქმეზე პატიმრობა დაუსწრებლად ჯერ კიდევ გასული წლის ოქტომბერში შეეფარდა, რის შემდეგაც მასზე ოფიციალური ძებნა გამოცხადდა. ამჟამად სუსი დამატებითი მტკიცებულებების მოპოვებაზე მუშაობს, მათ შორის საზღვრის უკანონო კვეთისა და დივერსიის მომზადების მიმართულებით. გარდა ამისა, საქმეში ფიგურირებენ პოლიტიკური და ყოფილი თანამდებობის პირები — გამოძიება აქტიურად სწავლობს დაკავებულის კავშირებს ბაჩანა ახალაიასთან, პაატა ბურჭულაძესთან და არეულობის სხვა სავარაუდო ორგანიზატორებთან.

"დაკავებულს ბრალი საქართველოს სისხლის სამართლის კოდექსის 236-ე მუხლის მე-3 ნაწილით, გასული წლის 6 ოქტომბერს, დაუსწრებლად წარედგინა. მეორე დღეს, თბილისის საქალაქო სასამართლომ, მის მიმართ აღკვეთის ღონისძიების სახედ პატიმრობა გამოიყენა, ხოლო 8 ოქტომბერს პროკურორის დადგენილების საფუძველზე მის მიმართ გამოცხადდა ძებნა.

გარდა აღნიშნული კვალიფიკაციისა, გამოძიება მუშაობს დამატებითი მტკიცებულებების მოპოვებაზე დივერსიული აქტის თუ საზღვრის უკანონო კვეთის მომზადების მიმართულებით. ასევე გამოძიება მუშაობს დაკავებული პირისა და მისთვის დანაშაულებრივი დავალებების მიმცემი პირების კონტაქტების დადგენაზე ბაჩანა ახალაიასთან, პაატა ბურჭულაძესთან და 2025 წლის 4 ოქტომბრის დანაშაულის ორგანიზებაში ჩართულ სხვა პირებთან", — აღნიშნა მაღრაძემ.