შინაგან საქმეთა სამინისტროს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსმა იოსებ სიგუამ, რომელსაც მეუღლე ფიზიკურ ძალადობაში ადანაშაულებს, თანამდებობა დატოვა.

მანამდე, ცოლზე ძალადობის საქმეზე დაწყებული გამოძიების გამო, იოსებ სიგუას ელექტრონული სამაჯური შეაბეს. 11 ივლისს თბილისის საქალაქო სასამართლომ პოლიციის ყოფილ მაღალჩინოსანს ელექტრონული ზედამხედველობა ძალაში დაუტოვა. გადაწყვეტილება მოსამართლე თორნიკე ქოჩქიანმა მიიღო.

სიგუას ადვოკატის თქმით, "მსხვერპლის სტატუსის მქონე სოფიო სიგუას მიერ გაჟღერებული პოზიცია არ შეესაბამება რეალობას".

"ვფლობთ არაერთ გარემოებას და მტკიცებულებას, რომლითაც დასტურდება, რომ დაახლოებით ერთი კვირის წინ "ტვ პირველის" ეთერში გასულ სიუჟეტში გაცხადებული პოზიცია, რომელიც გააჟღერა მსხვერპლის სტატუსის მქონე სოფიო სიგუამ, არ შეესაბამება რეალობას", — განაცხადა იოსებ სიგუას ადვოკატმა თეონა გვაზავამ.

თავის მხრივ სიგუას ცოლი აცხადებს, რომ ქმრის მიერ მისი დევნის ფოტო და ვიდეო მტკიცებულებები არსებობს.

"არსებობს მოწმეები, არის მტკიცებულებები, ფოტო და ვიდეო მასალაც, დევნის ფაქტიც, რომ მუდამ ჩემს ლოკაციებზე იყო, სადაც ვიყავი, კარგი ის არის, რომ რეაგირება მოჰყვა - საპასუხო რეაქცია, რომელიც მათ ჰქონდათ, რომ ჩემი გამოსვლის შემდეგ მისი დაწინაურება მოეხდინათ, ზოგადად პრობლემაა და ასეთი საქმე არ უნდა ხალისდებოდეს", — განაცხადა სოფიო სიგუა-შატბერავამ.

სოფია სიგუა-შატბერავამ მეუღლეს ბრალდებები თავდაპირველად "ნოდარ მელაძის შაბათში" 5 ივლისს გააჟღერა. მისი თქმით, იოსებ სიგუა მას სიცოცხლის მოსპობით, მე-12 სართულიდან გადაგდებით ემუქრებოდა, ერთხელ კი იარაღიც შუბლზე მიადო. სოფია სიგუა იმასაც ამბობდა, რომ ქმარი მას ორსულობის დროსაც სცემდა. იოსებ სიგუას 2026 21 თებერვალს შემაკავებელი ორდერიც გამოუწერეს.

როგორც სოფია სიგუას ინტერესების დამცველი, ორგანიზაცია "საფარის" ხელმძღვანელი ბაია პატარაია სოციალურ ქსელში წერდა, ქალმა 10 ივლისს "112 ოთხჯერ გამოიძახა და მხოლოდ 11 ივლისის დილას მივიდა ეკიპაჟი გენინსპექციაში დარეკვის შედეგად".

შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსად იოსებ სიგუა რამდენიმე დღის წინ დანიშნეს. შსს-ში განხორციელებული საკადრო ცვლილებებით, მან და მზია ამაღლობელის საქმის მთავარმა ფიგურანტმა, ირაკლი დგებუაძემ თანამდებები გაცვალეს. რაც იმას ნიშნავს, რომ ირაკლი დგებუაძემ, იოსებ სიგუას პოზიციაზე გააგრძელა მუშაობა შსს-ში ქალაქ თბილისის პოლიციის დეპარტამენტის დეტექტივების მთავარი სამმართველოს უფროსმა, სიგუამ, კი დგებუაძის ადგილზე.