"ჩვენ ვაშენებთ მომავალს: უფრო ძლიერ ევროპას უფრო ძლიერ NATO-ში," — ამის შესახებ NATO-ს ანკარის სამიტის დეკლარაციაშია საუბარი.

დოკუმენტში ალიანსი კიდევ ერთხელ ხაზსს უსვამს NATO-ს მთავარ პრინციპს "თავდასხმა ერთზე არის თავდასხმა ყველაზე" და კვლავაც მხარს უჭერს "თავდაცვისა და შეკავების 360-გრადუსიან მიდგომას".

ალიანსი აცხადებს, რომ შეიარაღებაში ინვესტიციებს გააგრძელებენ, რათა შორ მანძილზე ზუსტი დარტყმები გააძლიერონ და "ყველა დასახულ მიზანს მიაღწიონ". განცხადებაში ასევე ხაზგასმულია ის, რომ ალიანსი უკრაინას ურყევ მხარდაჭერას უცხადებს.

მოკავშირეები 2026 წლისთვის იღებენ ვალდებულებას, უკრაინას 70 მილიარდი ევროს ღირებულების სამხედრო აღჭურვილობა გამოუყონ და მიესალმებიან ევროკავშირის გადაწყვეტილებას უკრაინისთვის მრავალწლიანი დაფინანსების გამოყოფის შესახებ.

ჩვენ, ჩრდილოატლანტიკური ალიანსის წევრი ქვეყნების სახელმწიფოთა და მთავრობების მეთაურები, შევიკრიბეთ ანკარაში, რათა კიდევ ერთხელ დავადასტუროთ ჩვენი ურყევი ერთგულება ვაშინგტონის ხელშეკრულების მე-5 მუხლით გათვალისწინებული კოლექტიური თავდაცვისა და ტრანსატლანტიკური კავშირის მიმართ. თავდასხმა ერთზე არის თავდასხმა ყველაზე. ჩვენი ერთიანობა, სოლიდარობა და კოლექტიური ძალა კვლავაც რჩება მშვიდობის, უსაფრთხოებისა და კეთილდღეობის საფუძვლად ჩვენი თავისუფალი და დემოკრატიული ალიანსის მილიარდი მოქალაქისთვის. ჩვენ კვლავ ერთგული ვართ შეკავებისა და თავდაცვისადმი ჩვენი 360-გრადუსიანი მიდგომისა.

ევროატლანტიკური უსაფრთხოებისა და სტაბილურობისთვის რუსეთის მხრიდან მომავალი გრძელვადიანი საფრთხისა და ტერორიზმის მუდმივი საფრთხის დასაძლევად, მოკავშირეები ასრულებენ ჰააგის თავდაცვის ვალდებულებას. 2025 წელს ევროპელმა მოკავშირეებმა და კანადამ თავდაცვის ძირითადი საჭიროებების დაფინანსება 139 მილიარდ დოლარზე მეტით გაზარდეს. ჩვენი ინვესტიციები უზრუნველყოფს საჭირო შესაძლებლობების განვითარებას, ამასთანავე, აძლიერებს ჩვენს სამრეწველო ბაზასა და მდგრადობას. დღეს ანკარაში ჩვენ ვაცხადებთ 50 მილიარდ დოლარზე მეტი ღირებულების ახალი შესყიდვების შესახებ, ვიღებთ ვალდებულებას კოლექტიური წარმოების სიმძლავრეების გაფართოებაზე და მრეწველობის სექტორთან თანამშრომლობაზე ინოვაციების დასაჩქარებლად. ჩვენ კვლავაც გავაგრძელებთ მუშაობას მოკავშირეებს შორის თავდაცვის სფეროში სავაჭრო ბარიერების აღმოსაფხვრელად და გამოვიყენებთ ნატოს პარტნიორობას თავდაცვის ინდუსტრიის სიღრმისა და თანამშრომლობის მაქსიმალურად გასაზრდელად.

ჩვენ ვაშენებთ მომავალს: უფრო ძლიერ ევროპას უფრო ძლიერ ნატოში — მოდერნიზებულ ალიანსს. ევროპელი მოკავშირეები და კანადა, ამერიკის შეერთებულ შტატებთან თანამშრომლობით, უფრო დიდ პასუხისმგებლობას იღებენ ალიანსის თავდაცვაზე. ნატოს შეკავება და თავდაცვა ეფუძნება ბირთვული, კონვენციური და საჰაერო თავდაცვის შესაძლებლობების სათანადო შერწყმას, რასაც ემატება კოსმოსური და კიბერრესურსები. ჩვენი მიზანია საბრძოლო უპირატესობის შენარჩუნება. ჩვენ ვახორციელებთ ინვესტიციებს ჩვენი შეიარაღებული ძალების განლაგების, მხარდაჭერისა და შენახვის შესაძლებლობებში, რათა მივაღწიოთ დასახულ მიზნებს ყველა სფეროში, მათ შორის შორ მანძილზე ზუსტი დარტყმების, ინტეგრირებული საჰაერო და საჰაერო თავდაცვის, უპილოტო სისტემების, მოწინავე ტექნოლოგიებისა და სადაზვერვო შესაძლებლობების მიმართულებით. ჩვენ ვქმნით თავსებად ტრანსატლანტიკურ საბრძოლო ღრუბლოვან სისტემას და ვნერგავთ ხელოვნური ინტელექტის მძლავრ მოდელებს.

უკრაინას თავისი წვლილი შეაქვს ტრანსატლანტიკურ უსაფრთხოებაში და მოკავშირეები ერთიანნი არიან უკრაინისადმი ურყევ მხარდაჭერაში, რათა მან დაიცვას თავისი თავისუფლება, სუვერენიტეტი და ტერიტორიული მთლიანობა. ამჟამად ევროპელი მოკავშირეები და კანადა ორმხრივი და მრავალმხრივი არხებით აფინანსებენ უკრაინისთვის განკუთვნილი უსაფრთხოების დახმარების უდიდეს ნაწილს. მოკავშირეები ხაზს უსვამენ, რომ ეს მხარდაჭერა უნდა იყოს თანაბარი, პროგნოზირებადი და გრძელვადიან პერსპექტივაში მდგრადი. 2026 წლისთვის მოკავშირეები იღებენ ვალდებულებას, უკრაინას გამოუყონ 70 მილიარდი ევროს ღირებულების სამხედრო აღჭურვილობა, დახმარება და ტრენინგი, და ადასტურებენ თავიანთ სუვერენულ მზადყოფნას, შეინარჩუნონ სულ მცირე ამავე მოცულობის მხარდაჭერა 2027 წელსაც. ამ მიზნით, მივესალმებით ევროკავშირის გადაწყვეტილებას უკრაინისთვის მრავალწლიანი დაფინანსების გამოყოფის შესახებ "უკრაინის მხარდაჭერის სესხის" მეშვეობით.

ალიანსი კვლავაც რეაგირებს და ეგუება სტრატეგიულ კონკურენციას, ყოვლისმომცველ არასტაბილურობას, ჰიბრიდულ საფრთხეებსა და პერიოდულ შოკებს, რომლებიც განსაზღვრავს ჩვენს ფართო უსაფრთხოების გარემოს.

მოკავშირეები კიდევ ერთხელ აღნიშნავენ, რომ ირანს არასოდეს უნდა ჰქონდეს ბირთვული იარაღი და მოუწოდებენ მას, სრულად სცეს პატივი ნავიგაციის თავისუფლებას ჰორმუზის სრუტეში.