"საქართველოს ახალგაზრდა იურისტთა ასოციაცია" (საია) რუსთავის N5 პენიტენციურ დაწესებულებაში მყოფი ოპოზიციონერი პოლიტიკოსის, ელენე ხოშტარიას ჯანმრთელობის მდგომარეობის გაუარესებასთან დაკავშირებით განცხადებას ავრცელებს. ორგანიზაცია ხაზგასმით აღნიშნავს, რომ პატიმრისთვის ადეკვატურ მკურნალობაზე უარის თქმა ან მისი არაჯეროვანი გაწევა სახელმწიფოს მხრიდან ადამიანის უფლებათა ევროპული კონვენციის მე-3 მუხლის (წამების, არაადამიანური ან დამამცირებელი მოპყრობის აკრძალვა) დარღვევას გამოიწვევს.

საია-ს განცხადებით, ოპოზიციონერი პოლიტიკოსის სისხლის სამართლის საქმე მართლმსაჯულების პოლიტიკური ანგარიშსწორების ინსტრუმენტად გამოყენების კიდევ ერთი თვალსაჩინო მაგალითია. შეგახსენებთ, რომ ელენე ხოშტარიას თბილისის მერის, კახა კალაძის საარჩევნო ბანერზე გაკეთებული წარწერის გამო, საქართველოს სისხლის სამართლის კოდექსის 187-ე მუხლით (ნივთის დაზიანება ან განადგურება) 1 წლითა და 6 თვით თავისუფლების აღკვეთა შეეფარდა 2026 წლის მარტში.

ორგანიზაცია მიუთითებს მედიისა და დაცვის მხარის მიერ გავრცელებულ ინფორმაციაზე, რომლის მიხედვითაც საპატიმროში ხოშტარიას ჯანმრთელობის მდგომარეობა საგრძნობლად გაუარესდა.

საია ასევე აღნიშნავს, რომ ადვოკატების მიერ კონსულტირებული თურქი ექიმების შეფასებით, სათანადო მკურნალობის გარეშე ხოშტარიას ჯანმრთელობას გამოუსწორებელი ზიანი, მათ შორის გადაადგილების უნარის სრული დაკარგვა ემუქრება. მიუხედავად იმისა, რომ ეს რეკომენდაციები პენიტენციურ დაწესებულებას 2 თვის წინ მიაწოდეს, პასუხი ამ დრომდე არ გაუციათ.

25 ივნისს ხოშტარია მედიცინის დოქტორმა მაკა იოსელიანმა მოინახულა, რომელმაც განაცხადა, რომ ძლიერი ტკივილის გამო პაციენტის ბოლომდე გასინჯვა ვერ მოხერხდა და საჭიროა კვლევების მულტიპროფილურ კლინიკაში ჩატარება.

საია ასევე წერს, რომ ექიმის ვიზიტამდე, პარტია დროას წარმომადგენელმა გიგა ლემონჯავამ აღნიშნა, რომ პენიტენციური სამსახური ხელოვნურად აჭიანურებდა მკურნალი ექიმის დაშვებას.
ამავდროულად, სპეციალური პენიტენციური სამსახურის გენერალურმა დირექტორმა, გიორგი პატარიძემ 27 ივნისს განაცხადა, რომ 29 ივნისს ელენე ხოშტარიას ციხეში ექიმი მოინახულებს, რის შემდეგაც მკურნალობის შემდგომი ნაბიჯები გადაწყდება.

საია ხაზს უსვამს სამედიცინო მომსახურების ეკვივალენტურობის პრინციპს — სახელმწიფო პენიტენციური სისტემა ვალდებულია პატიმარს უზრუნველყოფდეს ზუსტად იმავე ხარისხის სამედიცინო სერვისებით, რაც გარანტირებულია ნებისმიერი თავისუფალი მოქალაქისთვის სამოქალაქო სექტორში. საქართველოს პენიტენციური კოდექსის 140-ე მუხლის მიხედვით, თუ მკურნალობა დაწესებულებაში შეუძლებელია, პატიმარი უნდა გადაიყვანონ სამოქალაქო სექტორის საავადმყოფოში.

იურიდიული ორგანიზაცია ასევე მიუთითებს ადამიანის უფლებათა ევროპული სასამართლოს პრეცედენტულ სამართალზე

"ევროპულმა სასამართლომ დაადგინა, რომ მძიმე დაავადებების დროს მკურნალობის გაჭიანურება და პატიმრის დატოვება ისეთ პირობებში, სადაც მას ძლიერი ფიზიკური ტკივილი და სხეულის ფუნქციების შეუქცევადი დაზიანება ემუქრება, უთანაბრდება კონვენციის მე-3 მუხლით აკრძალულ არაადამიანურ და დამამცირებელ მოპყრობას

ამრიგად, როდესაც დაწესებულების შიდა სამედიცინო რესურსი შეიძლება ვერ აკმაყოფილებდეს პაციენტის სპეციფიკურ საჭიროებებს, სახელმწიფო ვალდებულია, უზრუნველყოს პირის დროული გადაყვანა სპეციალიზებულ კლინიკაში და მისი ადეკვატური მკურნალობა, განსაკუთრებით, იმ გამწვავებული ვითარების ფონზე, როდესაც ელენე ხოშტარია არის პოლიტიკური პატიმარი, რომლის მიმართაც პოლიტიკური ანგარიშსწორების მიზნით იქნა გამოყენებული მართლმსაჯულების ინსტრუმენტები", — ნათქვამია საია-ს განცხადებაში.

საიას განცხადება ვრცლად იხილეთ აქ.