22 ივნისს, 11:00 საათზე, დაკავებული ექიმის, გიორგი ჩახუნაშვილის მხარდასაჭერად, "თეთრხალათიანების სოლიდარობის აქცია" გაიმართება. ამის შესახებ სოციალურ ქსელში "კლინიკების ასოციაციის" ხელმძღვანელი, ვილი პაჭკორია. ის მოუწოდებს საქართველოში მოქმედ ყველა კლინიკას და ამბულატორიას, სოლიდარობის ნიშნად ჩაატარონ თეთრხალათიანთა 5 წუთიანი სოლიდარობის კონსილიუმი.

"საქართველოს კლინიკების ასოციაცია აღშფოთებულია მომხდარ ფაქტთან დაკავშირებით, ვინაიდან ასეთი ღვაწლმოსილი, გამოცდილი და პატივსაცემი ექიმი, პედიატრი, კარდიორევმატოლოგი, აკადემიკოსი გიორგი ჩახუნაშვილი იქნა უდანაშაულოდ დაკავებული. ამასთან დაკავშირებით, საქართველოს კლინიკების ასოციაცია მოუწოდებს საქართველოში მოქმედ ყველა კლინიკას და ამბულატორიას, სოლიდარობის ნიშნად, ხვალ დილით [22 ივნისს], 11:00 საათზე ჩავატაროთ თეთრხალათიანთა 5 წუთიანი სოლიდარობის კონსილიუმი. ყველანი თეთრი ხალათით კლინიკებთან დავდგეთ ერთი მოწოდებით: თავისუფლება და სოლიდარობა გიორგი ჩახუნაშვილს", — წერს ვილი პაჭკორია.

19 ივნისს მოსამართლე გიორგი გელაშვილმა 4 ოქტომბრის საქმეზე დაკავებული 7 პირი, მათ შორის 72 წლის ექიმი გოგი ჩახუნაშვილი, დამნაშავედ ცნო: გიორგი ჩახუნაშვილს მიესაჯა პატიმრობა 5 წლით; დავით ჟღენტს — 5 წლით; კახაბერ მჟავანაძეს — 5 წლით; დავით სტურუას — 5 წლით; კონსტანტინე კოკაიას — 5 წლით; ; ზაქრო ალბუთაშვილს — 5 წლით; ია დარახველიძეს — 3 წლით.