ჟურნალისტ გიორგი ცხვიტავას იუთუბ-ინტერვიუების ახალი ეპიზოდის სტუმარმა — ინფორმაციის თავისუფლების განვითარების ინსტიტუტის (IDFI) თანადამფუძნებელმა, ლევან ავალიშვილმა პოდკასტში კრემლის საინფორმაციო ოპერაციების ევოლუციასა და იმ ნარატივებზე ისაუბრა, რომლებიც, მისი თქმით, დღეს ქართულ პოლიტიკურ და მედიასივრცეშიც აქტიურად გამოიყენება.

როგორც თავად განაცხადა, IDFI-მ ჯერ კიდევ 2014-2015 წლებში ჩატარებული კვლევების ფარგლებში გამოავლინა საქართველოში პრორუსული ნარატივების გამავრცელებელი ქსელის ფორმირების ნიშნები, რომელიც სხვადასხვა ვებგვერდის, ორგანიზაციისა და ექსპერტული პლატფორმის საშუალებით მუშაობდა.

"ჩვენ უკვე მაშინ შემოვუკარით, ასე ვთქვათ, ზარი და დავინახეთ, რომ ეს პროცესი რაღაცნაირად შეუქცევად ხასიათს იღებდა... დღესდღეობით ჩვენ ვხედავთ, რომ მათ არა მხოლოდ ფრთები შეისხეს, არამედ სახელმწიფო სტრუქტურების მხარდაჭერა მიიღეს," — განაცხადა ავალიშვილმა.

მისი შეფასებით, თანამედროვე პროპაგანდა გაცილებით უფრო კომპლექსურ მექანიზმებზეა დაფუძნებული, ვიდრე ეს წარსულში იყო, ხოლო პროცესში მის გავრცელებას სოციალური ქსელები მნიშვნელოვნად აჩქარებს.

საუბრის მნიშვნელოვანი ნაწილი საქართველოში "ომის თემის" გამოყენებასაც შეეხო. ავალიშვილის შეფასებით, საზოგადოების ისტორიული ტრავმები ამ მიმართულებით განსაკუთრებით მოწყვლად ნიადაგს ქმნის, რის გამოც მსგავსი გზავნილები ძლიერ ემოციურ ეფექტს იწვევს. მისი აზრით, წლების გასვლის შემდეგ, საზოგადოებამ თავად უნდა შეაფასოს, რამდენად გამართლდა ადრე გავრცელებული პროგნოზები.

"გავიდა ეს წლები და სად მოხდა ის, რასაც ჩვენთან ამ უზარმაზარი ბანერებით აჯერებდნენ მოსახლეობას, რომ მეორე ფრონტი უნდა გაიხსნას, საქართველო ომში უნდა ჩაერთოს?," — თქვა მან.

ევროკავშირთან დაკავშირებულ საინფორმაციო კამპანიებზე საუბრისას ავალიშვილმა განაცხადა, რომ, ბოლო პერიოდში ახალი ნარატივებიც გაჩნდა, რომლებიც ევროპასთან ურთიერთობას უსაფრთხოების საკითხებს უკავშირებს.

"ვიზალიბერალიზაციის შეჩერება უდრის ომში არ ჩართვას. დაახლოებით, აი, ასეთი ფორმულირება შემოიტანეს. ანუ ან ომში უნდა ჩავერთოთ ან ვიზალიბერალიზაცია უნდა გვქონდეს, უვიზო მიმოსვლა ევროპასთან. ეს აბსოლუტური პროპაგანდაა," — აღნიშნა ექსპერტმა.

მისი აზრით, განსაკუთრებით მნიშვნელოვანი და გარდამტეხი ეტაპი 2024 წელს "რუსული კანონის" მიღება იყო, რასაც ის ქვეყნის პოლიტიკური კურსის ცვლილების ინდიკატორად აფასებს.

საუბრის დასასრულს პოდკასტის სტუმარმა აღნიშნა, რომ საინფორმაციო ზეწოლის პირობებში მთავარ მნიშვნელობას საზოგადოების მედეგობა და კრიტიკული აზროვნება იძენს. მისი თქმით, წინააღმდეგობა შესაძლებელია როგორც კვლევებითა და მედიით, ისე ყოველდღიურ საინფორმაციო სივრცეში აქტიური ჩართულობით.

სრული ინტერვიუ ნახეთ აქ: