"საქართველოს ეკლესიის უძველესი და ბრწყინვალე სულიერი მემკვიდრეობის კვალდაკვალ, რომელიც მისი მრავალი წმინდანის მოწმობითა და ერთგულებითაა გაბრწყინებული", — ქრისტიანთა ერთობის ხელშეწყობის დიკასტერიის პრეფექტი კარდინალი კურტ კოხი შიო III-ს საქართველოს მართლმადიდებელი ეკლესიის პატრიარქად არჩევას ულოცავს. მილოცვის წერილი დიკასტერიის გვერდზე, 11 მაისს გამოქვეყნდა.

"მის უწმინდესობასა და უნეტარესობას შიო III-ს
სრულიად საქართველოს კათოლიკოს-პატრიარქს,
მცხეთა-თბილისის მთავარეპისკოპოსს
და აფხაზეთისა და ბიჭვინთის მიტროპოლიტს.

თქვენო უწმინდესობავ და უნეტარესობავ, განსაკუთრებული სიხარულით შევიტყვე თქვენი არჩევის ამბავი საქართველოს მართლმადიდებელი ეკლესიის კათოლიკოს-პატრიარქის ტახტზე. მსურს, დიკასტერიისა და პირადად ჩემი სახელით, გადმოგცეთ გულწრფელი მოლოცვა იმ მსახურების გამო, რომელიც უფალმა, მართალთა ნაბიჯების წარმმართველმა, მოგანდოთ.

ღვთიური განგებულებით, თქვენ მოწოდებული ხართ ახალი და უფრო მომთხოვნი ფორმით, წმინდა სინოდის წევრ თქვენს ძმა ეპისკოპოსებთან ერთად, დამწყემსოთ იესო ქრისტეს სამწყსო, უფლის მაგალითით, რომელიც "თავის სულს დადებს ცხვართათვის", რათა საქართველოს ეკლესია გაიზარდოს ერთიანობაში, სიწმინდესა და ქველმოქმედებაში.

საქართველოს ეკლესიის უძველესი და ბრწყინვალე სულიერი მემკვიდრეობის კვალდაკვალ, რომელიც მისი მრავალი წმინდანის მოწმობითა და ერთგულებითაა გაბრწყინებული, დაე, თქვენმა მსახურებამ ხელი შეუწყოს გულითადი მეგობრობის კავშირების განმტკიცებასა და ჩვენს ეკლესიებს შორის კიდევ უფრო ძმური დიალოგის განვითარებას. დარწმუნებული ვარ, რომ თქვენი მსახურება გააძლიერებს სიყვარულისა და ერთიანობის იმ საკვრელებს, რომლებიც სულიწმინდის ნიჭით რეალურად, თუმცა ჯერ კიდევ არა სრულად, აერთიანებს იესო ქრისტეს ყველა მორწმუნეს, რათა სულ უფრო თვალსაჩინო გახდეს უფლის მცნება: "გიყვარდეთ ერთმანეთი, როგორც მე შეგიყვარეთ თქვენ". მამა ღმერთს ვევედრები, რომ ქართული მიწის წმინდანთა მეოხებით, უფალმა, თქვენზე უხვად გადმოავლინოს თავისი კურთხევა.

გპირდებით, რომ მოგიხსენიებთ ჩემს ლოცვებში და კვლავ გიდასტურებთ ჩემს პატივისცემას.

კარდინალი კურტ კოხი
ქრისტიანთა ერთიანობის ხელშეწყობის დიკასტერია", — ვკითხულობთ დიკასტერიის გვერდზე გამოქვეყნებულ წერილში.

Message of Cardinal Koch for the election of the Catholicos-Patriarch of All Georgia

Message of Cardinal Koch for the election of the Catholicos-Patriarch of All Georgia

ფოტო: https://www.christianunity.va/content/unitacristiani/en/cardinal-koch/2026/Saluti-e-messaggi/message-of-cardinal-koch-for-the-election-of-the-catholicos-patr.html

ცნობისთვის, საქართველოს 142-ე კათოლიკოს-პატრიარქი სენაკისა და ჩხოროწყუს მიტროპოლიტი, საპატრიარქო ტახტის მოსაყდრე შიო მუჯირი გახდა. დღეიდან ის იწოდება, როგორც უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი შიო III.

ტახტის მოსაყდრემ კენჭისყრაზე 39 ხმიდან 22 მიიღო. დანარჩენი ორი კანდიდატიდან, მროველ-ურბნელმა მიტროპოლიტმა იობ აქიაშვილმა მიიღო 9 ხმა, ფოთისა და ხობის მიტროპოლიტმა გრიგოლ ბერბიჭაშვილმა — 7 ხმა, 1 ხმა გაუქმდა.

შიო III სვეტიცხოვლის საკათედრო ტაძარში აკურთხეს. პატრიარქის აღსაყდრების რიტუალი 12 მაისს 10:00 საათიდან დაიწყო.