მექსიკის პრეზიდენტი კლაუდია შეინბაუმი სამხრეთკორეულ K-pop ჯგუფს, BTS-ს შეხვდა. შეხვედრა მეხიკოში, ნაციონალურ სასახლეში, ჯგუფის მსოფლიო ტურნეს ARIRANG-ის ფარგლებში დაგეგმილ კონცერტებამდე გაიმართა. გლობალური ვარსკვლავები — RM, ჯინი, შუგა, j-hope, ჯიმინი, V და ჯონგუკი პრეზიდენტს დაახლოებით 40 წუთის განმავლობაში ესაუბრნენ, რის შემდეგაც მათ სასახლის აივნიდან შეკრებილ საზოგადოებას მიმართეს.

მექსიკის პრეზიდენტის პრესსამსახურის მიერ გავრცელებულ ფოტოზე აღბეჭდილია BTS-ის 50 000-მდე ფანი, რომლებიც მეხიკოში, ნაციონალურ სასახლესთან (Palacio Nacional) ჯგუფის სანახავად შეიკრიბნენ

ფოტო: Mexico's Presidency press office/AFP

სოკალოს მოედანზე, კონსტიტუციის პლაზაზე, დაახლოებით 50 000 ფანი შეიკრიბა. BTS-ის წევრებმა საკუთარ ფანებს, ARMY-ს, ესპანურ და ინგლისურ ენებზე მიმართეს და მხარდაჭერისთვის მადლობა გადაუხადეს. გულშემატკივრები, რომლებიც მათ საათობით ელოდნენ, ჯგუფის ახალი ალბომიდან სიმღერებს ასრულებდნენ, მათ შორის კომპოზიციას Body to Body, რომელიც კორეული ხალხური სიმღერის, Arirang-ის ელემენტებს შეიცავს.

ჯგუფის ლიდერმა, RM-მა, შეკრებილებს მადლობა გადაუხადა: "მოუთმენლად ველით ხვალინდელ კონცერტს. მოდი, ერთად გავერთოთ! Te amo. Te quiero. Muchas gracias". ჯგუფის კიდევ ერთმა წევრმა, V-მ, აღნიშნა, რომ მექსიკა ძალიან მოენატრა და აქაური ენერგიით აღფრთოვანებულია. მან გამოსვლა დაასრულა თავისი საფირმო ფრაზით "Mucho picante!".

პრეზიდენტმა შეინბაუმმა სოციალურ ქსელში ჯგუფთან ერთად გადაღებული ფოტო გამოაქვეყნა, სადაც მას ხელში BTS-ის წევრების მიერ ხელმოწერილი ვინილი უჭირავს. მან აღნიშნა, რომ მუსიკა და ღირებულებები მექსიკასა და სამხრეთ კორეას აერთიანებს და დასძინა, რომ ჯგუფს მომავალ წელსაც ელოდება.

მექსიკა K-pop-ის მსოფლიო ბაზარზე მეხუთე ადგილს იკავებს და ერთადერთი ესპანურენოვანი ქვეყანაა გლობალურ ათეულში. BTS ქვეყანას ბოლოს 2017 წელს ეწვია. ცხრა წლის შემდეგ დაბრუნებულმა ჯგუფმა Estadio GNP Seguros-ზე დაგეგმილი სამივე კონცერტის 150 000-ზე მეტი ბილეთი სულ რაღაც 37 წუთში გაყიდა. ვარაუდობენ, რომ ეს კონცერტები მექსიკის ეკონომიკაში დაახლოებით 115.3 მილიონ დოლარს შეიტანს.

თუ BTS გიყვარს, გააკეთე ეს ქვიზი: რამდენად კარგად იცნობ BTS-ს?