ორიოდე წლის წინ The Bear-ის მოულოდნელი ეპიზოდი წლის ერთ-ერთი მთავარი მოვლენა იქნებოდა. კრისტოფერ სთორერის მიერ შექმნილი ჩიკაგოს რესტორნის შესახებ გადაღებული სტრესული და მძაფრი კომედიური დრამა ეკრანებზე გამოჩენისთანავე ნამდვილ ჰიტად იქცა. ის არაფერს ჰგავდა და ყველა მხოლოდ მასზე ლაპარაკობდა. სერიალის პირველმა სეზონმა 10 ემი მოიპოვა, მათ შორის საუკეთესო კომედიური სერიალის ნომინაციაში. მეორე სეზონმა 11 ემი დაიმსახურა, თუმცა მესამე სეზონი, 13 ნომინაციის მიუხედავად, ჯილდოს გარეშე დარჩა. The Bear-ის მეოთხე სეზონი წლევანდელი დაჯილდოების სეზონში მიიღებს მონაწილეობას, ფინალური ნაწილი კი ემისთვის 2027 წელს იბრძოლებს.

დროთა განმავლობაში ბევრი რამ შეიცვალა. ორმა იმედგამაცრუებელმა სეზონმა სერიალს ძველი დიდება დაუკარგა. ამიტომ, როდესაც გავრცელდა ინფორმაცია სპეციალური ეპიზოდის გამოსვლის შესახებ (რასაც ზაფხულში ფინალური სეზონი მოჰყვება), გარკვეული სკეპტიციზმი გამართლებული იყო.

Gary არის რიჩისა და მაიკი ბერზატოს დუეტი, რომელიც ებონ მოს-ბაკრაკმა და ჯონ ბერნტალმა დაწერეს (მსახიობები, რომლებიც ამ პერსონაჟებს განასახიერებენ და ამჟამად ბროდვეიზე სპექტაკლში Dog Day Afternoon ერთად მონაწილეობენ). სიუჟეტი მოგვითხრობს მოგზაურობაზე: რიჩის ცოლის მშობიარობამდე რამდენიმე საათით ადრე, პერსონაჟებს უცნობ ქალაქში უცნობი კლიენტისთვის საიდუმლო ამანათი მიაქვთ. Gary ფლეშბექ-ეპიზოდია. სერიალის მთავარი ხაზი მაიკის თვითმკვლელობის შემდგომ პერიოდს ეხება, აქ კი ჩვენ ვხედავთ რიჩის მანამ, სანამ ის რესტორნის სერვისის პროფესიონალი გახდებოდა და კრიმინალურ წვრილმანებზე უარს იტყოდა.

ფოტო: FX

მიუხედავად იმისა, რომ ქალაქი Gary ჩიკაგოსთან ძალიან ახლოსაა, ეპიზოდს მაინც "გზის კინოს" ატმოსფერო აქვს. The Bear კვლავაც არ არის კომედია, თუმცა ამ მოკლე მანძილზე თავს გადამხდარი ამბავი ბოლო წლების ერთ-ერთი ყველაზე სასაცილო მომენტია. რიჩი, რომელიც ჩიკაგოს განსახიერებაა, მშობლიური ქალაქის დატოვებისთანავე დაბნეული და აგრესიული ხდება.

ეპიზოდში ვიწრო ფოკუსის შენარჩუნებამ გაამართლა, თუმცა, გარკვეული ხარვეზები მაინც გვხვდება. შუა ნაწილი, სადაც რიჩი და მაიკი ბარში სხედან, ზედმეტად გაწელილია, იქმნება შთაბეჭდილება, რომ ეს არის ბრწყინვალე 30-წუთიანი ეპიზოდი, რომელიც 60 წუთამდე ხელოვნურად არის გაზრდილი.

მიუხედავად ამისა, ერთი სცენა ყველაფერს აკომპენსირებს. ალკოჰოლის, ნარკოტიკებისა და თვითგვემის ფონზე, მაიკი რიჩის მიმართ მძიმე და მწარე მონოლოგს წარმოთქვამს. მოს-ბაკრაკის უსიტყვო ტკივილი ამ სცენას გაუსაძლისად ემოციურს ხდის. ჩვენ უკვე ვიცით, რომ რიჩი ამ ყველაფერს დაძლევს და წინ წავა, მაიკი კი ვერა. ეს არის ერთ-ერთი საუკეთესო მომენტი სერიალის ისტორიაში.

Gary-ს ცალკე ეპიზოდად გამოშვება მეხუთე სეზონისთვის კარგის ნიშანია. როდესაც The Bear ფორმას კარგავს, ის ხშირად იკარგება ფლეშბექებში. შესაძლოა, ეს ეპიზოდი იმის ნიშანია, რომ სერიალი ძველ ფოკუსს უბრუნდება. ფინალური სცენა კი მიმდინარე დროში გვაბრუნებს და მიგვანიშნებს, რომ მომდევნო სეზონში რიჩის ბევრი სირთულე ელის. იმედია, შოუ თავის საუკეთესო ფორმას დაიბრუნებს.

The Bear-ის მეხუთე, ფინალური სეზონი 25 ივნისს გამოვა.