უკრაინაში, ფრონტის წინა ხაზზე, დაღუპული ქართველი მებრძოლის, 24 წლის რევაზ გეგეჭკორის ვინაობა ოფიციალურად დადასტურდა. ამის შესახებ ინფორმაციას ჟურნალისტი ლაშა ბერულავა ავრცელებს.

მისი თქმით, გეგეჭკორი რამდენიმე თვის წინ დაიღუპა, თუმცა მისი იდენტიფიცირება მხოლოდ ახლა, დაახლოებით ერთი თვის წინ გაგზავნილი დნმ-ის ნიმუშის პასუხის საფუძველზე გახდა შესაძლებელი.

როგორც ლაშა ბერულავა წერს, რევაზ გეგეჭკორი აფხაზეთიდან, კერძოდ გალიდან დევნილი ოჯახიდან იყო. ის ჟიტომირში დაიბადა და გაიზარდა. 2022 წელს, რუსეთის სრულმასშტაბიანი ინტერვენციის დაწყებისას, 20 წლის სტუდენტმა უკრაინის შეიარაღებულ ძალებში სამსახური ნებაყოფლობით დაიწყო. ახლობლების ინფორმაციით, იგი მშობლებს უმალავდა, რომ საბრძოლო მოქმედებების ეპიცენტრში იმყოფებოდა. რევაზ გეგეჭკორს ჟიტომირში დაკრძალავენ.

"უკრაინაში დღეს დადასტურდა, რომ დნმ ანალიზისთვის დაახლოებით ერთი თვის წინ გაგზავნილი ნიმუში 24 წლის ქართველ მებრძოლს ჟიტომირში მცხოვრებ რევაზ გეგეჭკორს ეკუთვნის, რომელიც ფრონტის წინახაზზე რამდენიმე თვის წინ დაიღუპა.
რევაზ გეგეჭკორი აფხაზეთიდან დევნილი ოჯახიდანაა, თვითონ ჟიტომირში დაიბადა და გაიზარდა, მანამდე კი ოჯახი გალში ცხოვრობდა.

2022 წლის თებერვალში, 20 წლის სტუდენტმა იარაღი აიღო ხელში და მტერთან საბრძოლველად წავიდა, მშობლებს კი ატყუებდა, თითქოს წინახაზზე არ იყო.
"სინამდვილეში კი იქ იდგა, სადაც ყველაზე მეტად "ცხელოდა". ის იბრძოდა მტერთან პირისპირ, ყველაზე წინ, იქ, სადაც თითოეული წამი სიცოცხლესა და სიკვდილს შორის გამავალ ბეწვის ხიდზე გადიოდა. მისი ბრძოლა მხოლოდ უკრაინის თავისუფლებისთვის არ ყოფილა", — წერს ოჯახის ახლობელი კახა კვეკვესქირი, რომელიც ამბობს, რომ თავად რევაზსაც კარგად იცნობდა:

"ეს იყო ბრძოლა იმ მორალური კოდექსისთვის, რომელიც სისხლით ქართველმა მეომარმა საუკუნეების მანძილზე გამოატარა: ბრძოლა თავისუფლებისთვის, ერთგულება სამშობლოსთვის და თავგანწირვა სიმართლისთვის.

როდესაც ისტორია თავის ფურცლებზე დიდებული გმირების სახელებს ამოტვიფრავს, იქ აუცილებლად იქნება ამ ახალგაზრდა ბიჭის სახელიც.
მისი ცხოვრება შეიძლება მოკლე იყო,
მაგრამ მისი სიმამაცე — უკვდავი!

მშვიდობა და ნათელი მის სულს, ვუსამძიმრებ ჩემს ძალიან ახლობელ ოჯახს და ვუსურვებ მხნეობას !..", — წერს კახა კვეკვესქირი.

უკრაინაში დაცემულ რევაზ გეგეჭკორს ჟიტომირში დაკრძალავენ.

დიდება გმირებს!"— დაწერა ლაშა ბერულავამ.