კოალიცია ძლიერი საქართველო -— ლელოს საგარეო პოლიტიკური გუნდი 5 მაისს საქართველოში აკრედიტებულ დიპლომატიურ კორპუსს შეხვდა. შეხვედრაზე 20-მდე ქვეყანა იყო წარმოდგენილი, კოალიცია ძლიერი საქართველო — ლელოს მხრიდან კი შეხვედრას ბადრი ჯაფარიძე, გრიგოლ გეგელია და სალომე სამადაშვილი ესწრებოდნენ.

სამუშაო შეხვედრა თბილისში, დახურულ კარს მიღმა გაიმართა. მოწვეულმა დიპლომატებმა ძლიერი საქართველო - ლელოს ლიდერებთან ერთად, გლობალური გეოპოლიტიკური გამოწვევების ფონზე, საქართველოს სტრატეგიული პოზიციონირების აუცილებლობის შესახებ იმსჯელეს. საუბარი შეეხო შიდა პოლიტიკურ საკითხებსა და "ძლიერი საქართველო - ლელოს" მომავალ სამოქმედო სტრატეგიას.

"ვხვდებით საქართველოში აკრედიტირებულ დიპლომატიურ კორპუსს იმ მიზნით, რომ პირველ რიგში, გავაცნოთ მათ ჩვენი პარტიული გეგმები, ასევე ცხადია, ვისაუბრებთ დღეს ჩვენი ქვეყნის წინაშე მდგარ გამოწვევებზე. ჩვენთვის ძალიან მნიშვნელოვანია, დავსახოთ გზები, რომ ჩვენი ქვეყანა არ დარჩეს სრულ იზოლაციაში დღევანდელი ხელისუფლების მიერ გატარებული პოლიტიკის შედეგად და გვსურს საუბარი იმაზე, როგორ გვესახება ქვეყანაში როგორც დემოკრატიული გადატვირთვა, ასევე საქართველოს ევროკავშირში გაწევრიანების დღის წესრიგის დაბრუნება ჩვენი ქვეყნის პოლიტიკურ ცხოვრებაში". — განაცხადა სალომე სამადაშვილმა შეხვედრამდე.