არაბულ კომპანიასთან გაფორმებული ხელშეკრულების გამო, კრწანისის ტყე-პარკისა და გონიოს დაცვის საორგანიზაციო ჯგუფი ქართულ ოცნების წინააღმდეგ სასამართლოში სარჩელს ამზადებს. საორგანიზაციო ჯგუფის წევრების განცხადებით, სარჩელის მზადება აქტიურად მიმდინარეობს. ამის შესახებ მათ დღეს გამართულ პრესკონფერენციაზე განაცხადეს.

ამას გარდა, დღეს ცნობილი გახდა საორგანიზაციო ჯგუფის მეორე ინიციატივა — ისინი 2 მაისს, 12:00 საათზე კრწანისის ტყე-პარკის დასუფთავების აქციას გამართავენ.

"ქართულმა ოცნებამ და არაბულმა კომპანიამ გამოაცხადეს, რომ უკვე გაყიდულია 300-ზე მეტი ბინა, ეს კი იმ პირობებში, როდესაც მშენებლობის ნებართვაც კი არ არის ჯერ გაცემული, ეს ფაქტი პროექტის გასაიდუმლოებასთან ერთად აღრმავებს კორუფციულ ვარაუდებს.

გონიოსა და კრწანისის ტერიტორია ეკუთვნის ქართველ ხალხს და არა რომელიმე პარტიას, ან ერთ კონკრეტულ პიროვნებას. სწორედ ამიტომ 2 მაისს, დღის 12:00 საათზე გეპატიჟებით საერთო გასვლაზე კრწანისის ტყე-პარკში დალაგების აქციისთვის," — განაცხადა საორგანიზაციო ჯგუფმა.

ინიციატივა "ჯერ საქართველოს" დამფუძნებლის, ვიქტორ ყიფიანის განცხადებით, ეს სასარჩელო მოთხოვნა მარტივი არ იქნება, იმ პირობებში, რასაც ქართული მართლმსაჯულება დღეს წარმოადგენს.

"ჩვენ ვეცდებით დავასაბუთოთ, რომ საჯარო სიკეთე ბევრად უფრო მეტია, ვიდრე კონკრეტული მხარის კომერციული საიდუმლოება და მისი ინტერესი. საკითხი დამუშავების ეტაპზეა, ბუნებრივია ეს არ იქნება მარტივი სასარჩელო მოთხოვნა მით უმეტეს იმ პირობებში, რასაც ქართული მართლმსაჯულება დღეს წარმოადგენს," — თქვა ვიქტორ ყიფიანმა (კომენტარს "ტვ პირველი" ავრცელებს).

ქართული რესპუბლიკის თანადამფუძნებელმა, გიორგი თავართქილაძემ განაცხადა, რომ პროექტთან დაკავშირებით "ვარაუდი კორუფციაზე ლოგიკურია".

"იქიდან გამომდინარე, რომ "ქართული ოცნების" პრემიერი, თავდაცვის მინისტრი და უამრავი მაღალი თანამდებობის პირი უკვე ამ რეჟიმის პირობებშიც კორუფციაზე ზის ციხეში და იმის გათვალისწინებით, რომ ეს Eagle Hills-ი ცნობილია თავისი სკანდალური პროექტებით, ეს ორივე ერთად კიდევ ერთხელ გვიმტკიცებს, რომ ვარაუდი კორუფციაზე რა თქმა უნდა არის ლოგიკური და ძალიან დიდი ალბათობით შეიძლება ამაში იყოს საქმე, რის გამოც თავისთავად გასაჯაროებული ხელშეკრულება არავითარ შემთხვევაში "ქართულ ოცნებას" არ აწყობს," — თქვა გიორგი თავართქილაძემ (კომენტარს "ტვ პირველი" ავრცელებს).

შეგახსენებთ, 2025 წლის იანვარში მთავრობის ადმინისტრაციამ გაავრცელა ინფორმაცია იმის შესახებ, რომ დეველოპერული კომპანია Emaar Properties/Eagle Hills-ი საქართველოში $6 მლრდ მოცულობის ინვესტიციას განახორციელებდა. თანამშრომლობის მემორანდუმი კომპანიასა და ქართულ მხარეს შორის აბუ-დაბიში ირაკლი კობახიძის ვიზიტის ფარგლებში გაფორმდა.

ეკონომიკისა და მდგრადი განვითარების მინისტრმა, მარიამ ქვრივიშვილმა და კომპანია "იგლ ჰილსის" დამფუძნებელმა, მოჰამედ ალი ალაბარმა საინვესტიციო შეთანხმებასა და საერთო კომპანიის ჩამოყალიბების შესახებ ხელშეკრულებას 2025 წლის 22 ოქტომბერს მოაწერეს ხელი, რომლის ფარგლებშიც "იგლ ჰილსი" თბილისსა და გონიოში დეველოპერულ პროექტებს განახორციელებს. მარიამ ქვრივიშვილის შეფასებით, მნიშვნელოვანია, რომ შეთანხმების თანახმად, საქართველო პროექტების პარტნიორად და კომპანიის 33%-იანი წილის თანამესაკუთრედ განისაზღვრა.

"Eagle Hills-ის ნამოქმედარი ნახეთ სერბეთში და თავად გააკეთეთ დასკვნები მათზე" — ინტერვიუ ნიკა შურღაიასთან