საბერძნეთის დედაქალაქის პოლიცია შეიარაღებულ კაცს ეძებს (გავრცელებული ინფორმაციით, კაცი 89 წლისაა), რომელმაც ათენის ცენტრში, სოციალური დაცვის ოფისსა და სასამართლო შენობაში ცეცხლი გახსნა, რის შედეგადაც სულ მცირე ოთხი ადამიანი დაიჭრა. ინფორმაციას Associated Press (AP) ავრცელებს.

პოლიციის ცნობით, გადაჭრილი თოფით შეიარაღებულმა პირმა თავდაპირველად სოციალური დაცვის ოფისში გახსნა ცეცხლი და ერთი თანამშრომელი დაჭრა. შემთხვევის ადგილზე მისულმა სამართალდამცველებმა დაშავებულს დახმარება აღმოუჩინეს, თუმცა თავდამსხმელმა მიმალვა მოასწრო.

როგორც Associated Press წერს, ადგილობრივმა მედიამ სათვალთვალო კამერის ჩანაწერი გაავრცელა, სადაც ჩანს მამაკაცი, რომელიც მშვიდად კვეთს ქუჩას და მარჯვენა ხელში მოკლელულიანი თოფი უჭირავს.

პოლიციის განცხადებით, იგივე პირი ეჭვმიტანილია მოგვიანებით ათენის ცენტრის სხვა ნაწილში მდებარე სასამართლოს შენობის პირველ სართულზე ცეცხლის გახსნაში. იქ რამდენიმე ადამიანი დაიჭრა. სამართალდამცველებმა შემთხვევის ადგილზე იარაღი უკვე იპოვეს.

AP-ის ცნობით, ტელევიზიით გადაცემულ კადრებში ჩანდა, როგორ გადაჰყავდათ სასწრაფო დახმარების ბრიგადებს სასამართლოს შენობიდან სულ მცირე სამი დაშავებული.

სროლის მოტივი ჯერჯერობით უცნობია. ERT-ის ცნობით, თავდამსხმელმა სასამართლოში დატოვა კონვერტები დოკუმენტებით, სადაც, სავარაუდოდ, თავისი ქმედების მიზეზებს განმარტავდა.