მიხეილ ხიდურელი საჯარო სამართლის იურიდიული პირის — საჯარო და კერძო თანამშრომლობის სააგენტოს თავმდჯომარედ დაინიშნა. შესაბამის ბრძანებას ხელი 27 აპრილს ირაკლი კობახიძემ მოაწერა.

"საჯარო და კერძო თანამშრომლობის შესახებ" საქართველოს კანონის მე-9 მუხლის მე-4 პუნქტის საფუძველზე, დაინიშნოს მიხეილ ხიდურელი საჯარო სამართლის იურიდიული პირის საჯარო და კერძო თანამშრომლობის სააგენტოს თავმჯდომარედ", — წერია ბრძანებაში.

ცნობისთვის, მიხეილ ხიდურელი აქამდე ეკონომიკის სამინისტროს სააგენტოს "აწარმოე საქართველოში" ხელმძღვანელობდა. პოზიციაზე ის კონკურსის საფუძველზე 2018 წელს დაინიშნა. მისი საქმიანობა ინვესტიციების მოზიდვას, ექსპორტის ხელშეწყობასა და მეწარმეობის განვითარებას უკავშირდებოდა.

ამასთან, 27 აპრილს, მთავრობამ პარლამენტში წარადგინა კანონპროექტი, რომლის მიხედვითაც საჯარო-კერძო თანამშრომლობის (PPP) სააგენტო არსებული სახით უქმდება, რომლის ფუნქციებიც ეკონომიკის სამინისტროს დაექვემდებარება. ცვლილებების თანახმად, სააგენტოს სახელი და ფორმატი იცვლება და იგი სსიპ "ინვესტიციებისა და ექსპორტის"“ სააგენტოდ ჩამოყალიბდება. ამის შესახებ ინფორმაციას bm.ge წერს.

მიხეილ ხიდურელის განმარტებით, თავად სააგენტოს ეკონომიკის განვითარების კორპორაციად ტრანსფორმაციის პროცესში გადაწყდა, რომ ინვესტიციების და ექსპორტის მხარდაჭერის მიმართულება ცალკე სააგენტოს სახით ჩამოყალიბდეს და ეკონომიკის სამინისტროს დაექვემდებაროს.

"ჩათვალეთ, რომ ის გუნდი, რომელიც ამ წარმატებაზე იყო პასუხისმგებელი, სრულად რჩება და მეტსაც გეტყვით, როდესაც უკვე სააგენტოს ექნება ცალკე ფუნქცია, ანუ აღარ იქნება "აწარმოესთან" ერთად, სადაც ბევრად დიდი ბიუჯეტური თემები ტრიალებდა, მეტი კონცენტრაცია იქნება ინვესტიციის მოზიდვის საკითხზე.

თქვენ ნახეთ პრემიერ-მინისტრის და მინისტრის პოზიცია ამ თემასთან დაკავშირებით, რომ დაგეგმილია ძალიან ბევრად უფრო დიდი მასშტაბით ამ საკითხებზე [ინვესტიციების მოზიდვა და ექსპორტის მხარდაჭერა] მუშაობა. შესაბამისად ჩვენ როგორც კი ეს კანონი შეიცვლება, დაიწყება რეორგანიზაცია. რეორგანიზაციის ფარგლებში მოხდება გაძლიერება, ზოგიერთ დეპარტამენტის შემთხვევაში რაოდენობრივი, ზოგიერთ დეპარტამენტში ხარისხობრივი," — განაცხადა მან.