სომხეთის პრემიერმინისტრის, ნიკოლ ფაშინიანის თქმით, საქართველოსთან საზღვრის დემარკაციის დღის წესრიგთან დაკავშირებით, ქართველ პარტნიორებთან შეთანხმება მიღწეულია. ამის შესახებ განცხადება ფაშინიანმა 27 აპრილს, სომხეთის ეროვნული უსაფრთხოების სამსახურის სასაზღვრო ძალების შექმნის დღისადმი მიძღვნილ ღონისძიებაზე სიტყვით გამოსვლისას გააკეთა.

ამასთან, პრემიერმინისტრმა ხაზგასმით აღნიშნა, რომ აზერბაიჯანთან და საქართველოსთან მიმდინარე დემარკაციის პროცესების დასრულებით, ფაქტობრივად, დასრულდება სომხეთის რესპუბლიკის საზღვრების განსაზღვრა.

მისივე შეფასებით, აღნიშნული პროცესის დასრულება ქვეყანას მისცემს შესაძლებლობას, საერთაშორისო დონეზე აღიარებულ საზღვრებში უფრო მყარად და თავდაჯერებულად განაგრძოს განვითარება.