საქართველოს სახალხო დამცველმა "იარაღის შესახებ" საქართველოს კანონში ცვლილების შეტანის შესახებ კანონისა და თანხმლები საკანონმდებლო ცვლილებების თაობაზე, ირაკლი კობახიძეს სამართლებრივი შეფასება გაუგზავნა.

შეფასებაში ყურადღება გამახვილებულია აღნიშნული ცვლილებების შედეგად ადამიანის უფლებებზე, განსაკუთრებით კი, ფსიქიკური ჯანმრთელობის პრობლემების და ნივთიერებებზე დამოკიდებულების მქონე პირთა მიმართ, შესაძლო უარყოფით გავლენაზე და ხაზგასმულია კანონმდებლობის გადახედვისა და შესაბამისი ცვლილებების განხორციელების საჭიროებაზე, რათა უზრუნველყოფილი იყოს მისი შესაბამისობა ადამიანის უფლებათა სტანდარტებთან.

"ერთიანი საინფორმაციო ბაზის შემოთავაზებული მოდელი ქმნის პერსონალური მონაცემების თვითნებური, გაუმართლებელი და არაპროპორციული დამუშავების რეალურ და მაღალი ინტენსივობის რისკს.

თანამედროვე სახელმწიფოს სტაბილურობის ერთ-ერთი უმნიშვნელოვანესი პირობა კერძო და საჯარო ინტერესებს შორის პრიორიტეტების სწორად და სამართლიანად განსაზღვრა, ხელისუფლებისა და ადამიანის ურთიერთობის გონივრულად დაბალანსებული სისტემის შექმნაა. რაც, პირველ რიგში, გამოხატულებას ჰპოვებს ყოველი კონკრეტული უფლების შინაარსისა და ფარგლების ადეკვატურ საკანონმდებლო განსაზღვრაში.

მნიშვნელოვანია რომ არსებული ერთიანი საინფორმაციო სისტემის მოდელი, რომელიც ჯანმრთელობის მდგომარეობასთან დაკავშირებული განსაკუთრებული კატეგორიის მონაცემების ავტომატურ გამოყენებას [მოპოვება, შენახვა, დამუშავება] ითვალისწინებს, შეიცვალოს პირის ჯანმრთელობის მდგომარეობის ინდივიდუალურ შეფასებაზე დაფუძნებული მოდელით, რაც უპასუხებს ეროვნული და საერთაშორისო სტანდარტების მოთხოვნებს და უზრუნველყოფს დაცული იქნას ადამიანების კონსტიტუციური და კონვენციური უფლებები, მათ შორის, ანტი-დისკრიმინაციული კანონმდებლობა და გაეროს შეზღუდული შესაძლებლობის მქონე პირთა უფლებების კონვენციის (CRPD) პრინციპები.

გამოვთქვამ მზადყოფნას, ვითანამშრომლო ყველა რელევანტურ კონსტიტუციურ ორგანოსთან, რათა თავიდან იქნეს აცილებული საკანონმდებლო ცვლილებების უარყოფითი გავლენა მოწყვლად ჯგუფებზე და ხელი შევუწყო ადამიანის უფლებების დაცვაზე დაფუძნებულ საკანონმდებლო განვითარებას." — წერია საქართველოს სახალხო დამცველის შეფასებაში.