ჟურნალისტ და სამხედრო მიმომხილველ გიორგი ცხვიტავასთან ჩაწერილ ვიდეოინტერვიუში, საქართველოს დაზვერვის სამსახურის ყოფილმა ხელმძღვანელმა, გენერალ-მაიორმა შალვა ლომიძემ ახლო აღმოსავლეთში განვითარებულ მოვლენებზე ისაუბრა.

მისი თქმით, ახლო აღმოსავლეთში მიმდინარე პროცესები არ არის მხოლოდ ლოკალური დაპირისპირება, ეს არის ირანის მიერ ათწლეულების წინ დაწყებული სტრატეგიის კულმინაცია. გენერლის განმარტებით, ირანის მიერ პროქსი ჯგუფების გამოყენება 80-იანი წლებიდან იღებს სათავეს. ეს არ არის შემთხვევითი დაჯგუფებების ერთობლიობა, არამედ კარგად გააზრებული ჰიბრიდული მოდელია.

ლომიძის თქმით, ეს ჯგუფები არ არიან ჩვეულებრივი დაქირავებული მებრძოლები, ისინი ირანის დიპლომატიის "უხილავი" გაგრძელებაა:

"ირანის გარშემო მიმდინარე მოვლენებმა თვალსაჩინო გახადა, თუ რამდენად მნიშვნელოვანია ირანის დაქვემდებარებაში არსებული პროქსი ჯგუფების, ჰიბრიდული ჯგუფების ფაქტორი ირანის საშინაო თუ საგარეო პოლიტიკის წარმოებაში," — აღნიშნა შალვა ლომიძემ.

მიუხედავად იმისა, რომ საქართველო ახლო აღმოსავლეთის უშუალო ნაწილი არ არის, გენერალ-მაიორის ანალიზი ცხადყოფს, რომ რეგიონული დესტაბილიზაცია პირდაპირ საფრთხეს უქმნის ჩვენს ეროვნულ ინტერესებს.

"შემიძლია ვთქვა, რომ, დიდი ალბათობით, დღეს, რუსეთის სპეციალური სამსახურები სხვადასხვა ფორმებით და საშუალებებით საქართველოში აწარმოებენ სხვადასხვა ტიპის სადაზვერვო აქტივობებს... რაც შეეხება ირანის ელჩის განცხადებას, ის ნამდვილად შეიცავდა მუქარის რაღაცა კომპონენტებს", — ამბობს ლომიძე

• მარკო რუბიოსა და კობახიძის საუბრის შემდეგ, ირანის ელჩი საქართველოში მუქარის შემცველ განცხადებას აქვეყნებს

მისი განცხადებით, ამ ეტაპზე საქართველო ირანისთვის პირდაპირი სამიზნე სახელმწიფოს შთაბეჭდილებას არ ტოვებს, თუმცა ეს არ გამორიცხავს, რომ ირანი საქართველოს მიმართ აწარმოებს გარკვეული ტიპის ჰიბრიდულ აქტივობებს და ამას მომავალშიც გააგრძელებს.

"ჩვენ ვიცით რომ ირანს ამის გამოცდილება გააჩნია, ვიცით რა ხერხებითა და მეთოდებით ახორციელებს ასეთი ტიპის მოქმედებებს და ისიც ვიცით, რომ ირანი დღეს პოლიტიკურად და სამხედრო თვალსაზრისით არ იმყოფება მარტივ მდგომარეობაში, შესაბამისად, იგი შეეცდება მის ხელთ არსებული ყველა რესურსის გამოყენებას", — განაცხადა გენერალ-მაიორმა შალვა ლომიძემ.

მისი თქმით, კარგი იქნება თუ ამ ყველაფერს სახელმწიფო, როგორც პრობლემას ისე აღიქვამს და ამ პრობლემასთან დაკავშირებით, როგორც რუსული ჰიბრიდული, ისე ირანული პროქსი აქტივობების წინააღმდეგ კონკრეტულ სტრატეგიას შექმნის.

"საქართველოს შემთხვევაში ვიტყოდი, რომ კარგი იქნება, რომ ეს პრობლემა, როგორც პრობლემა დაინახოს სახელმწიფომ. ამ პრობლემასთან დაკავშირებით, როგორც რუსული ჰიბრიდული, ასევე ირანული პროქსი აქტივობების შესახებ შექმნას ზოგადი სტრატეგია, დაიწყოს ჰიბრიდული ბრძოლა ჰიბრიდულ გამოწვევებთან მიმართებით", — განაცხადა შალვა ლომიძემ.

ინტერვიუ სრულად იხილეთ აქ: