პარტია გახარია საქართველოსთვის დიუშენის კუნთოვანი დისტროფიის საკითხზე ჯანდაცვის მინისტრის, მიხეილ სარჯველაძის განცხადებას გამოეხმაურა და ის მწვავედ გააკრიტიკა. ინფორმაციას პარტიის პრესსამსახური ავრცელებს.

პარლამენტის დეპუტატმა და ჯანდაცვის კომიტეტის წევრმა ქეთევან ბაკარაძემ ბრიფინგზე განაცხადა, რომ მიხეილ სარჯველაძის პოზიცია ფაქტობრივად ნიშნავს უარს დაავადების მქონე ბავშვებისთვის სასიცოცხლო პრეპარატის დაფინანსებაზე.

"ჯანდაცვის მინისტრმა სარჯველაძემ, რომელიც თვეების განმავლობაში ვერ ბედავდა სასოწარკვეთილ მშობლებთან პირისპირ შეხვედრას და თვალებში ჩახედვას, რამდენიმე წუთის წინ ბრიფინგით, ფაქტობრივად, უარი განაცხადა დიუშენის კუნთოვანი დისტროფიის დიაგნოზის მქონე ბავშვებისთვის სასიცოცხლო პრეპარატის დაფინანსებაზე. ქვეყნის ჯანდაცვის პოლიტიკის განმსაზღვრელმა პირმა 31 ბავშვი, ფაქტობრივად, გაწირა ტრაგედიისთვის, ბავშვები, რომლებიც სწორედ მისგან ელოდნენ მათი ცხოვრების ხარისხის გაუმჯობესებისა და სიცოცხლის გახანგრძლივების ერთადერთ შესაძლებლობას. მშობლებისთვის და ფართო საზოგადოებისთვის სრულიად მიუღებელია ის არგუმენტები, რომელზეც აპელირებდა ბატონი სარჯველაძე," — განაცხადა ბაკარაძემ.

ამასთან, პარტიაში აცხადებენ, რომ საკითხზე პარლამენტში ჯანდაცვის უწყების ხელმძღვანელის დაბარებას გეგმავენ.

"ჩვენმა პოლიტიკურმა გუნდმა მიიღო გადაწყვეტილება, სასწრაფო წესით ინტერპელაციაზე პარლამენტში დავიბაროთ ჯანდაცვის მინისტრი, სადაც მას მოუწევს კითხვებზე პასუხის გაცემა, რას აკეთებს ჯანდაცვის სამინისტრო და ხელისუფლება, როცა ეს ადამიანებს ყველაზე მეტად სჭირდებათ," — აღნიშნა პარტიის პოლიტსაბჭოს წევრმა.