საქართველოს სახალხო დამცველი სოციალურ ქსელში მთავრობის ადმინისტრაციასთან დიუშენის კუნთოვანი დისტროფიის მქონე ბავშვების მშობლების შეკრების თაობაზე განცხადებას ავრცელებს და შინაგან საქმეთა სამინისტროს მოუწოდებს, უზრუნველყოს მონაწილეთა მშვიდობიანი შეკრების თავისუფლება.

როგორც გავრცელებულ განცხადებაშია აღნიშნული, სახალხო დამცველი აქტიურად ადევნებს თვალს დიუშენის კუნთოვანი დისტროფიის მქონე ბავშვების მშობლების მიერ გამართულ აქციას, სადაც ისინი მათი შვილებისთვის აუცილებელი მედიკამენტებით უზრუნველყოფას ითხოვენ.

მათივე ინფორმაციით, შეკრების მონაწილეებს არ ეძლევათ შესაძლებლობა, კანცელარიის წინ არსებულ სკვერში განათავსონ დროებითი კონსტრუქციები და სხვადასხვა ატრიბუტიკა.

"საქართველოს სახალხო დამცველი აქტიურად ადევნებს თვალს საქართველოს მთავრობის ადმინისტრაციასთან დიუშენის კუნთოვანი დისტროფიის მქონე ბავშვების მშობელთა მიერ გამართული შეკრების მიმდინარეობას, რომლის მონაწილეებიც მათი შვილების აუცილებელი მედიკამენტებით უზრუნველყოფას ითხოვენ. მედიით გავრცელებული და სახალხო დამცველის აპარატისთვის მოწოდებული ინფორმაციით, შეკრების მონაწილეებს არ ეძლევათ კანცელარიის წინ არსებულ სკვერში დროებითი კონსტრუქციებისა და სხვადასხვა ატრიბუტიკის განთავსების შესაძლებლობა," — ნათქვამია განცხადებაში.

სახალხო დამცველი განსაკუთრებულ ყურადღებას ამახვილებს საკითხის სენსიტიურობაზე და შინაგან საქმეთა სამინისტროს მოუწოდებს, — უზრუნველყოს მთავრობის ადმინისტრაციასთან შეკრებილი პირების მშვიდობიანი პროტესტის უფლება.

"საქართველოს სახალხო დამცველი მოუწოდებს საქართველოს შინაგან საქმეთა სამინისტროს — უზრუნველყოს მთავრობის ადმინისტრაციის მიმდებარედ მყოფ პირთა მშვიდობიანი შეკრების თავისუფლება. ამასთან, საკითხის სიმწვავისა და განსაკუთრებული სენსიტიურობის გათვალისწინებით, სახალხო დამცველი ხაზს უსვამს საქართველოს შინაგან საქმეთა სამინისტროს წარმომადგენლების მხრიდან პროტესტში მონაწილე მშობლებთან აქტიური და შინაარსობრივი დიალოგის წარმართვის საჭიროებას, რაც, ამინდისა თუ სხვა ფაქტორების გათვალისწინებით, არსებული პრობლემის მოგვარებისკენ იქნება მიმართული", — წერს საქართველოს სახალხო დამცველი, ლევან იოსელიანი.

შეგახსენებთ, გუშინ დიუშენის კუნთოვანი დისტროფიით დაავადებული ბავშვების მშობლებმა მთავრობის კანცელარიასთან ღამე გაათენეს. ისინი სახელმწიფოსგან მედიკამენტებით უზრუნველყოფას ითხოვენ.

მანამდე, მათ ყოველ ორშაბათს 17:00 საათზე მთავრობის კანცელარიასთან საპროტესტო აქციები დააანონსეს.