19 აპრილის ღამეს ბერი ნიკოლოზი (ნარიმანი) მაქარაშვილი ფონიჭალაში, საცხოვრებელი სახლიდან გამოასვენეს. მისი გარდაცვალების შესახებ ინფორმაცია გუშინ გავრცელდა.

მთელი დღის განმავლობაში, ბერი ნიკოლოზის საცხოვრებელ ბინაში საგამოძიებო მოქმედებები მიმდინარეობდა. ადგილზე მობილიზებული იყვნენ ექსპერტ-კრიმინალისტები, პარალელურად კი ვითარება პერიოდულად იძაბებოდა — მრევლს შენობაში შესვლა სურდა, რის საშუალებასაც სამართალდამცავები არ აძლევდნენ. შეკრებილები აცხადებდნენ, რომ ტერიტორიას იქამდე არ დატოვებდნენ, სანამ ბერი ნიკოლოზის ცხედარს არ ნახავდნენ.

ბერი ნიკოლოზის მრევლის თქმით, ის 9 აპრილის შემდეგ არ უნახავთ და მათივე განმარტებით, ბერს გადაადგილება უჭირდა.

"მამა ნიკოლოზი თავისი საცხოვრებელი ბინიდან გამოვიდა და მრევლის დახმარებით წინა მეზობლის კარებთან მივიდა, უჭირდა გადაადგილება, კარის სახელური ორჯერ ჩამოწია და გასაღების ადგილზე მიანიშნა. მას შემდეგ მამაოს ბინაში ჩამი-ჩუმი არ ისმის, ის არ გადაადგილდება და არც ხმას იღებს", — წერს 17 აპრილს გამოქვეყნებულ პოსტში გვერდი "ქრისტე მეფე ნარიმანი".

ამავე გვერდის მიერ გავრცელებულ ინფორმაციაში წერია, რომ 17 აპრილს სამართალდამცავებმა ბერი ნიკოლოზის ბინის წინ მდებარე ბინაში სათვალთვალო კამერები დააყენეს.

"მამა ნიკოლოზის საცხოვრებელი ბინის წინა ბინაში, შევიდა ორი პოლიციელი და ბინის მეპატრონე. გამოსვლის მერე კარებზე დატოვეს განცხადება:

"ბინაში დამონტაჟებულია სათვალთვალო კამერა." მრევლის ორი წევრი იქ იმყოფებოდა — თვითმხილველები", — წერია ინფორმაციაში.

გარდაცვალების ოფიციალური მიზეზი ამ ეტაპზე დაუდგენელია. მრევლის თქმით, მას ჯანმრთელობის მძიმე მდგომარეობა ჰქონდა. აღსანიშნავია ის გარემოებაც, რომ გავრცელებული ინფორმაციით, მრევლის გარკვეული ნაწილი სასწრაფო სამედიცინო დახმარების გამოძახების წინააღმდეგი იყო. ისინი ამბობდნენ, რომ ამის "კურთხევა არ ჰქონდათ".

შეგახსენებთ, ბერი ნიკოლოზ (ნარიმანი) მაქარაშვილი საცხოვრებელ სახლში გარდაცვლილი 19 აპრილს იპოვეს. შინაგან საქმეთა სამინისტრომ NEWS.On.ge-ს განუცხადა, რომ გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს.